WILLEMSTAD.- Polis a pone man riba e hòmber ku a sende kas di su eks djabièrnè pasá na kandela. Ta trata di e kas ku a kima den Kaya Regenboog na Seri Papaya.

Manera nos a informá den edishon di djasabra pasá, e señora doño di e kas i su eks a dal den otro ku outo. E hòmber a baha for di outo, drenta otro outo parse i a bisa e señora ku e ta bai kima su kas.

E señora a bai warda di polis bai hasi keho di menasa, miéntras e hòmber tabata kimando su kas na Seri Papaya.

Brantwer a yega basta lihé pero no por a evitá ku e kas a kima. E hòmber lo a bisa e eks ku despues di e akto aki e lo mata su kurpa.

Sinembargo polis a detené djasabra. Segun e informe di polis, relashoná ku entre otro e kaso di pegamentu di kas na kandela den Kaya Regenboog ku a tuma lugá djabièrnè dia 8 di mart 2024 polis a hasi un detenshon.

Djasabra 9 di mart 2024 e hòmber G.S.N di 46 aña di edat nasé na Kòrsou a presentá na warda di polis Otrobanda, na unda alrededor di mitar di 6 di atardi el a keda detené pa pegamentu di kas na kandela, menasa i destrukshon.

A presentá e sospechoso dilanti di un fiskal ouksiliar ku a ordená su enkarselamentu pendiente di mas investigashon.