WILLEMSTAD.- Durante kontrol ayera nochi, polis a detené un komersiante propietario di Mr Porter den Nieuwestraat pa no kooperá ku polis.

Tim multidisiplinario ayera nochi a Sali riba diferente kontrol. Nan a bai entre otro Pietermaai. Na e negoshi Mr Porter a bai kontrolá i a resultá ku e no tabatin pèrmit, e doño parse tampoko kier a identifiká su mes i e no a kooperá ku polis. Esaki a pone ku a disidí na sera e negoshi i detené e komersiante. Den esei su señora no a keda kontentu ku tabatin fotografnan pa filma i saka potrèt. E señora a ranka e telefòn di nos fotograf/reportero kita. Rápidamente nos fotógrafo a ranka esaki bek i konsekuentemente a surgi un forsageo. Polis mester a kai aden pa evitá ku kos ta Sali for di man.

Ora e kontrol a kontinuá den Penstraat a sera otro negoshi. Ta trata di Nul Twintig. Aki manera EXTRA por a tuma nota na e sitio, e lugá tabata skur, porta sera pero ora a pasa dor di un porta chiki a resultá ku e lugá tabatin klientenan paden sinta ainda i tabata kasi 9 or di anochi.

Outoridatnan a sera e negoshi aki tambe pa inkumplimento ku lei. Nan mester sera 8 or pa kliente i pa 9 or e lugá ta sera.