WILLEMSTAD - Pa un temporada kaba Landsrecherche, bou di mando di Ministerio Públiko, ta hasiendo un investigashon penal tokante di froude ku sosten di corona kometé pa un èks-empleado di Desaroyo Sosial, Labor i Bienestar (SOAW). Ta sospechá ku el a depositá sosten di corona riba su propio kuentanan di banko. Den kuadro di e investigashon, awe mainta, 8 di febrüari 2022, bou di mando di hues komisario (RC) i den kolaborashon ku Kuerpo Polisial di Kòrsou (KPC), a hasi un entrada hudisial na kas di e èks-empleado aki. Durante di e entrada hudisial a konfiská dokumentu i portadó di dato den interes pa e investigashon. A detené e èks-empleado, un hòmber di 32 aña di edat. OM a indiká ku e investigashon ta kontinuá i lo no hasi mas komentario tokante di esaki na e momento aki.