WILLEMSTAD.- Entre aprel 2020 i mei 2021 Kòrsou a duna mas ku 223 mion Naf supsidio na areglonan di sosten empresarial. Asina Zulaika Mook direktor di sektor di desaroyo ekonómiko i inovashon na Ministerio di Desaroyo Ekonómiko (MEO) a splika. Djamars último el a duna e sifranan durante konferensia di prensa di gobièrnu di Kòrsou.
For di kuminsamentu di krísis di COVID-19 Kòrsou a konosé tres areglo finansiá ku sosten di likides di Hulanda. Esun mas grandi ta e areglo di NOW, ku ta enserá ku gobièrnu ta duna supsidio pa salario na kompanianan. Durante e periodo di aprel 2020 te mei 2021 Kòrsou a duna 135.17 mion Naf na supsidio. Ku esaki a yuda un kantidat promedio di 484 empresa i 7.892 trahadó. Banda di esei Kòrsou den e periodo menshoná a duna 34.35 mion Naf na sosten pa empresario individual (TBZO). Ku esaki a yuda un kantidat promedio di 1.894 empresario. Tambe Kòrsou ta konosé un areglo pa duna gastunan operashonal fiho (TVL). E areglo a kuminsá den e tres kuartal di 2020. E supsidio total di TVL ta 53.72 mion Naf. Ku esaki Kòrsou a yuda 427 empresa.
Relashoná ku sosten empresario individual TBZO e siguiente sektornan ta mas presente: transporte públiko (bùs i taksi), músiko, barberia/kapsalon i hende ku ta lora man (por ehèmpel bende pastechi, djus òf souvernir).
Relashoná ku supsidio pa salario NOW Mook a splika ku por distinguí tres periodo di aplikashon haltu: aprel i mei 2020, desèmber 2020 i aprel i mei 2021. Den e último 14 luna tres sektornan ta mas afektá dor di konsekuensianan di e krísis, segun Mook: turismo/horeca (27.1 %), benta por detal (17.7%), benta general (14.3%).
Komo resultado di un evaluashon ku MEO a hasi, a bira hopi kla ku un di e problemanan mas grandi bou di empresarionan na Kòrsou ta ‘mal interpretashon i ehekushon robes di entrega di 20% di salario di trahadó’. Tambe hopi kompania a bin ku dedukshon (verrekening) despues di kontròl.
Relashoná ku e areglo di gastunan operashonal fiho (TVL) MEO, despues di un evaluashon, a duna di konosé ku mayoria di kompania ku a hasi uso di TVL ta kompanianan ku a bini na remarke pa NOW tambe (95%). Mas ku 50% ku a hasi uso di TVL ta kompanianan di turismo. Tambe Zulaika Mook a bisa: promedio di 95% di kompania ta keda aprobá i pagá. Tambe a bisa ku porsentahe promedio di pèrdida di entrada ta 57%. I na final Mook a konkluí ku ‘sosten di TVL a yega na tempu i a yuda pa mantené kompanianan habrí den e 14 lunanan di pandemia.’