Polis aktuando firme kontra ponedónan fever

WILLEMSTAD.-Kuerpo polisial ta hasiendo esfuerso grandi pa sigui kumpli ku tur nan tareanan i banda di esei atendé ku kontrol nesesario den kuadro di medidanan di Covid. Hefe interino di Kuerpo Polisial Raymond Ellis a splika gobièrnu a pone medidanan pa limitá aglomerashon hustamente pa kontené ku Covid ta sigui plama. Polis ta nota ku kosnan ta pasando ku ta kompletamente for di regla.

Un di e kambionan drástiko ta ku a kanselá 22.000 karta di eksonerashon. Tabatin 34.000 karta di eksonerashon i entrante 2 di aprel a kanselá mayoria i a keda ku solamente 12.000 karta di eksonerashon ku ta spesial pa realmente funshonnan vital.

Ellis a duna di konosé ku tin un grupito den komunidat ta asta kere ku polis ta robòt, pero esei no ta e kaso. Polis ta bon na altura di situashon sosial, situashon finansiero i asta problemanan relashonal. Ta polisnan ku a kuminsá kontrolá durante di e promé lockdown a bai bèk warda i kuminsá kolekta sèn, bai kumpra kos i traha pakete pa yuda famianan den situashon deplorabel.

Polis ta nota tambe ku tin un grupito ku ke reta polis. Ta trata di e grupo ku ta neglishá tur regla i ta keda hasi manera nan ke. Ellis a indiká ku polis ta aktua firme kontra e grupito ei. Definitivamente polis no ta bai tolerá muchu mas.

Jules Ilario, hefe di kuerpo uniformá a indiká ku polis a nota ku tin basta ponementu di fever atrobe. Ayera tambe tabatin ponementu di fever. Ilario a hasi apelashon riba e publiko ku ta bai wak i tambe esnan ku ta pone fever pa stòp ku e aktividat aki. E ta peligroso i a pone bida di hende na peliger. No lubidá ku hospital ta yen i apénas por atendé kasonan. Ayera tabatin ponementu di fever entre otro na Rondeklipweg, Sta. Cruz i Brievengat. Polis a konfiská vários di e motersaikelnan aki ayera.

Polis a mira videonan ku ta kore riba retnan sosial i ta pidi tur esnan ku ta partisipando pa nan entrega nan mes. Nan ta haña 24 ora pa nan mes entrega promé ku polis bai buska nan. Ta pidi komunidat tambe pa duna informashon anónimo ken ta esnan ku ta pone fever. E kos aki ta kita hopi tempu di polis kaminda por a  atendé otro situashonnan ku tambe mester haña atenshon.

Mas aleu Ilario a splika ku plachi di dia ta pa hende bai atendé asuntunan vital manera hiba hende dòkter, bai bakuna, hasi kompra etc. e plachi di dia su intenshon no ta pa sali ku famia pa keiru. Esnan ku tin eksonerashon pa duna kuido, esta mantelzorg, mester pèrkurá pa duna kuido den e orario ku ta stipulá. Mas detaye den edishon di EXTRA.