WILLEMSTAD.-For di Ulanda a drenta informashon ku entretantu Karibe ulandes tambe tin e un otro variante di Corona vírus. Segun e instituto ulandes RIVM, Karibe Ulandes tin e variante indio. RIVM t a bisa ku nan a topa ku un (1) kaso di e variante di e vírus ku a mutuá. No ta konosí riba kua di e islanan a topa ku a variante indio. NOS ta indiká ku na Ulanda ainda no a topa ku e variante indio.

E variante aki lo ta pèrkurá pa oumentu drástiko di e kantidat di hendenan ku ta keda kontagiá na India. Esei ta motibu di hopi preokupashon serka sientífikonan. Tin informashon ku e bakunanan lo ta ménos efektivo kontra di e mutuashon nobo aki.

E instituto ulandes a informa ku nan ta sigui e desaroyonan rondó di e plamamentu di vírus na India hopi djaserka, konsiderando ku na India alrededor di 200.000 hende ta keda kontagiá pa dia. Segun un bosero, no ta konosí si e variante indio lo ta mas kontagioso ku e mutuashonnan anterior. Kisas ta e situashon na India ta kondusí na e mutuashon aki.