WILLEMSTAD.- E situashon di kantidat di kasonan ta hasi ku GGD no por alkansá tur hende pa informá nan di ta positivo na e vírus di Corona. For di siman pasá dr. Izzy Gerstenbluth a bati bèl pasobra no por a lokalisá alrededor di 200 hende pa informá nan ku nan a tèst positivo na Corona vírus.
E situashon aki a keda mesun kos. Mirando e kantidat di tèst i resultadonan ta riba 200, dr. Gerstenbluth a bisa ku a keda difísil pa lokalisá hendenan. P’esei awor ta hasi uso di “app” kaminda ta informá e hendenan di a positivo i tambe ta manda nan video kiko nan tin di hasi na momentu ku nan ta infektá pa COVID-19. Asina ta trata na alkansá e hendenan infektá. Pasobra ketu bai nan no ta kue telefòn di GGD. Di e forma aki tòg ta trata pa e informashon yega serka esun ku ta malu dje vírus.
Tambe dr. Izzy a trata asuntu di hospital. El a bisa ku ora bo drenta hospital ku Corona vírus bo ta keda mas tantu dia interná. P’esei un supliká na personanan ku sinti malu, no bai hospital. Ni bai hospital pa tèst di Corona. Keda kas i yama dòkter di kas pa sa ki dia por bai tèst.
Mas aleu dr. Gerstenbluth a bisa ku hospital tin sufisiente kapasidat pa atendé hende i tambe aparato pa hala rosea.
Relashoná ku e tènt ku CMC a harma, dr. Gerstebluth a bisa ku niun hende ta keda tratá medikamente den e tènt. E tènt ta pa akapará e hende na momentu ku e yega CMC i pa evaluá personanan pa sa ki tratamentu nan mester i unda pa bai den CMC.
Pa loke ta trata “sneltest”, dr. Gerstenbluth a bisa ku nos ta usando esakinan basta dia kaba. Na momentu ku bini for di eksterior tin di hasi PCR tèst. I despues di 5 dia e tèst Antige. Mester sa ki ora ta usa e tèstnan. E Antigen ta pa determiná e variante di Inglatera.
Dr, Gerstenbluth a enfatisá un biaha mas ku si ke frena COVID-19, mester keda den kas. Ademas e manera mas efektivo kontra di COVID-19 ta dor di vakuna. Pronto lo anunsiá mas grupo ku por vakuná.
Finalmente dr. Gerstenbluth a splika ku na momentu un hende haña COVID, e chèns pa e reinfektá ta hopi abou. Segun evidensianan mundialmente ta bisa ku ta posibel pa bolbe pega ku e vírus di Corona. Pero e porsentahe pa reinfektá ta hopi abou. Pero esei no ta kita ku mester keda paden pa frena e vírus, dr. Gerstenbluth a indiká.