WILLEMSTAD.- A kuminsá ku e proseso di vakunashon na kasnan di kuido pa hende grandi, pero tambe e grupo di indokumentadonan i e “digital nomands”. Esaki a bin dilanti durante di un  pènel pa informá tokante di “Vakunashon”. E  pènel ta konsistí di médiko dr. Jerry Semper, inmunólogo dr. Ashley Duits i sra. Lydia Regina botikario. Tur ta forma parti dje tim di vakunashon.

Durante di e pènel a bin dilanti ku na e momentu aki lamentablemente no ta posibel pa vakuná hendenan na kas. Ta bai aki pa personanan ku ta na kama i no por move pa yega e sentronan di vakunashon.

E pènel a splika ku nan ta pensando pa vakuná hende na kas. Sinembargo tur kos ta sinta den transporte dje vakuna.

Nan a splika ku e vakuna Pfizer tin di keda wardá den frizer na -80 grado, i usa den -20 grado. Pa pasa kas pa kas ta difísil, pasobra mester tene kuenta ku e temperatura ku mester salbaguardiá e vakuna i e tempu pa transporte bai kas pa kas. Sinembargo e ta un punto di atenshon pa hasié na un manera responsabel posibel.

Tambe e pènel a splika ku ya nan a bai vários kas di grandi pa vakuna hende grandi. A kuminsá ku kas di hende grandi ku tin hopi hende manera Betesda, Habaai etc. Ta e intenshon pa pone dos òf tres kas di kuido chikí riba un dia pa vakuna. Na momentu ku transportá e vakuna pa sitionan di vakunashon, esaki ta bai kompañá ku eskolta polisial. E tim mobil ta yega serka tur kas di kuido no mester hansha. Kasnan di kuido ta riba programa di vakunashon.

Tambe e tim ta bai na un sentro di salú na Kas Chikí, pa por vakuna indokumentadonan den nos komunidat. Segun e pènel a splika ku e vakunashon ta bai a base di sita. Den e kaso aki e status dje personanan no ta relevante si nan ta legal òf no. Mester protehá e komunidat i nan tambe. E kos t’asina bon organisá ku polis ta keda na distansia p’asina no stroba e personanan aki yega pa tuma nan vakuna.

E “Digital Nomands” tambe ta otro grupo di persona na Kòrsou ku tin di keda vakuna. “Digital Nomands” ta hende ku ta sali for di nan pais, bai un oro pais, i for di aki nan ta traha. Solamente nan mester di bon Internet pa por hasi nan trabou na kualke parti di mundu ku nan ta. E pènel a splika ku aki na Kòrsou tin grupo grandi di “Digital Nomands” di Hulanda ku ta bin biba aki pa 6 luna. Pa nan vakuná, nan tambe mester registrá i mester tin pasport válido i proba ku ta 4 luna òf mas nan ta keda na Kòrsou, i ku nan ta disponé di un seguro den eksterior. Asina solamente por regla pa nan por registrá pa vakuná.

(Foto Los Angeles, California)