WILLEMSTAD.- Ministerio di GMN riba indikashon di Minister President Pisas enkargá tambe ku sektor di medio ambiente, resientemente a laga limpia un roi den bario di Montaña pa aliviá abitantenan di molèster di Giant African Land Snail. Esaki a tuma lugá tambe despues ku vários habitante a hasi un keho ofisial na departamentu di THZ. E roi konserní ta tapá ku e mata Bellisima kual ta forma un refugio ideal pa e kokolishi grandi aki. E kantidat grandi di flornan di e mata tabata atraé tambe bastante abeha. Ku limpiesa di e roi aki, a aliviá abitantenan di e plaga di kokolishi i a eliminá posibel menasa di abeha.
Giant African Land Snail ta e kokolishi gandi ku ya pa basta aña kaba ta presente den nos medio ambiente. Den kaso di e bario na Montaña aki e kokolishinan tin refugio bou di e tapeit di Bellisima i momentu ku áwaseru kai nan ta sali i kuminsá subi muraya di kurá i di kasnan. Abitantenan mes a eliminá bastante kokolishi den nan afan pa kombatí nan, pero esaki no a duna muchu resultado. Despues di a hasi keho ofisial na THZ, Minister Pisas a duna instrukshon pa hasi e trabounan di limpiesa kual a tuma lugá algun dia despues.