KRALENDIJK – Ayera anochi Kuerpo Polisial Hulanda Karibense (KPCN) na Boneiru a anunsiá ku a haña e turista merikano, Jessica Collins di 47 aña di edat, sano i salvo. Ku e último desaroyo aki KPCN a kanselá su búskeda. Último dianan despues ku a bira konosí ku Jessica Collins tabata pèrdida a kousa basta konsternashon na Boneiru i asta tabatin spekulashon ku e kaso aki ta relashon ku e kaso Epstein na Merka.

Djaweps 25 di sèptèmber, polis a konfirmá ku Jessica Collins ta seif i bon. E Departamentu di Supervishon di Estranhero (Vreemdelingentoezicht) di KPCN a bai ku señora Collins pa kòntròl debí na su estadia dokumentá riba Boneiru. E lo tin ku bai duna kuenta i rason pakiko e no a subi su barku krusero Carnival Horizon dia 17 di sèptèmber último mas i kiko tabata su intenshon.

KPCN ta gradisí tur partner i siudadano ku a kontribuí na e búskeda di Sra. Collins.