WILLEMSTAD.- Retnan sosial ta  ariba abou ku publikashon di un notisia di EXTRA, pero di forma manipulá. Ta trata di un notisia riba nos wèpsait i den korant mes, pero no a bai nos Facebook. Mentenan ku ménos bon intenshon a saka kopia di e página di korant, hasi adaptashon na dje i publiká esaki, hasiendo komosifuera ta EXTRA a publik’é.

Ta trata di un notisia ku nos a publiká den korant dia 6 di mei ku ta relatá un kaso di un tata di kriansa ku a tene relashon seksual ku un menor di edat. E kaso aki ta unu basta serio i EXTRA ta atendé ku koutela e tipo di kasonan aki.

Nos ta hasi tur kos posibel pa protehá e víktima i p’esei no ta pone esaki su nòmber i ta pone solamente inisial di e sospechoso. Tampoko nos ta drenta den detaye di e kaso, ni bisa nòmber di kaya ets ets. Pero grandi tabata nos sorpresa ku otronan ku ta konosí ku tantu e víktima komo e sospechoso a kue e notisia, adapt’é i pone potrèt aserka. Esaki ta un kaso grave ku ta violá derechi di privasidat e kriatura ku a pasa den e trouma aki. E ta un violashon di e derechi di outor tambe pa reprodusí un artíkulo i bai mas leu ainda pa adapt’é dor di pone potrèt kuné.

EXTRA ya a tuma e pasonan hurídiko nesesario i nos a hasi denunsia., Un biaha mas mester respetá no solamente e derechi di outor den e kaso aki di EXTRA pero ta lubidá kuantu daño ta hasi na un kriatura ku e tempu ei no a kumpli ni 12 aña. E tambe tin derechi di sigui su bida. Nos ta kondena e akto aki i nos lo no sinta ketu pa hustisia persiguí esnan kulpabel.