Cijntje; nos no ta sivilisá pa komportá

WILLEMSTAD.- Dia 12 di yuli e aña aki, tabata asina leu ku e trabounan ku e di tres fase di e área di rekreashon na Marie Pampun a bira un echo. Den presensia di promé minister Pisas, minister di desaroyo ekonómiko Cijntje, minister di enseñansa siensia i kultura van Heydoorn, minister Martina di BPD i minister Cooper di VVRP a kòrta e sinta pa asina duna apertura ofisial di e área aki. I ayera nochi tabata tristu pa mira e mesun área bunita di rekreashon aki ta vlam. A sende palapanan na kandela lagando un tristesa atras.

Minister enkargá ku turismo Ruisandro Cijnte a bai e sitio kaminda el a pone su mes na altura di kiko tabata pasando. Ta un situashon tristu asina e minister a ekspresá su mes,

“Esaki ta di lamentá, ta situashon ku nos no a spera. Nos mes ku nos mes, nos mes hendenan, 3 hóben bou di palapa i despues a Sali na kareda i vlam grandi por a mira atras”. Minister Cijntje a bisa ku ta un proyekto pa pueblo por gosa di dje. Ta algu ku e ta kondena i e ta kere esnan ku a hasi nan kulpabel, tin di para responsabel. I pesei e minister a pidi hendenan ku sa ken a hasi e baina aki, e mayornan di e hóbennan entre otro, ta bon pa duna kara i splika kiko a pasa.

Di parti di CTB e tipo di komportashonnan aki ta sòru pa bin ku reglanan mas estrikto, pa protehá e lokalidat aki ora e komportashonnan aki tuma lugá. Mester bin regla i esei pueblo lo tin di komprondé pa asina protehá e área.

Nos mes ta pega kandela i ta trese ku bo ta pèrdè e lokalidat, pèrdè konstrukshon i no ta nada agradabel.

“Mi ta kere tin hende ku lo sa i tin hende ku a mira i nos mester wak kon ta protehá e sitio aki. Den seno ku CTB i otro stakeholder lo wak kon ta protehá e área aki pa evitá  e tipo di komportashonnan aki sosodé”.

No por ta asina ku nos ta konstruí i nos mes ta bash’e abou. Ta un sitio bunita kaminda tur hende por disfrutá di dje. E kandela aki ta un hende a bin kuné.

“Por mira ku e komportashon di hende ta pone ku mester pone regla. Nos no ta sivilisá pa komportá den un presiosidat asina aki na Marie Pampun. Nos lo mester bai drech’e i e ta trese gastu kuantioso kuné. Nos mester bai den seno i wak kon ta bai hasié pero tene kuenta ku lo bin ku reglanan rígido”, asina minister Cijntje a bisa.

Área di rekreashon

Un área di playa ku 9 palapa, sitio pa mucha hunga, área pa fitness den airu liber inkluso pa hende ku desabilidat, área pa piknik, skatepark, vèlt pa beach volley, 4 kiosko pa aktividat komersial, un edifisio pa tualèt i diferente banki i mesa. Ademas a drecha i amplia e área pa kana i kore ku tabata eksistí kaba i e asera na Dr. Martin Luther King Boulevard. Tambe a konstruí diferente “pad” nobo, pone landscaping, instalá diferente tipo di lus i a realisá instalashon pa awa, lus i riolering.

Riba e fotonan por mira dia a inougur’é dia 12 di yuli pasa i ayera nochi kon kandela a kome algun palapa bai kuné