SCHIPHOL – E sospechoso di e asesinato di e yu di Kòrsou Gwenette Martha, Ilias K. a tende fiskal pidi kastigu di bida largu pe. Sospecha di vários otro kaso mas di asesinato, Ilias a pidi Korte riba último dia di su kaso pa “kastigá mi pa loke ma hasi i no pa loke ta keda bisa ku ma hasi.” Den su último palabra el a pidi pordon na su víktimanan i na famianan pa e kasonan ku e ta keda asosiá kuné.

Ministerio Públiko a pidi kastigu di bida largu pa Ilias K ku un tempu mes tabata forma parti di e banda kriminal di Gwenette Marta ku a keda asesiná na 2014. Un proseso penal ku a dura no ménos ku 42 luna i ku tin Ilias K di 34 aña di edat for di Amsterdam komo e sospechoso prinsipal huntu ku 8 otro sospechoso mas. Mayoria di prueba den e kaso aki a bin for di komunikashon di e telefònnan konfiská.

Segun Ministerio Públiko ta sali na kla for di e pruebanan aki ku Ilias K a duna òrdu pa tres likidashon. Ademas el a duna òrdu pa dos likidashon mas pero esaki nan nunka no a keda ehekutá. Ilias K a keda detené na 2018 pero semper a hasi apelashon riba su derechi di no papia te ku djabièrnè ora ku el a tende di e kastigu pidi den su kontra. Na e momentunan ei el a disidí pa habri su buki. Na polis el a atmití ku e tabata forma parti di un banda kriminal i ku e tabata na altura di e plannan di likidashon pero e no a hunga un ròl aktivo den esaki. Su úniko embolbimentu tabata preparashon pa un atentado pero ku esaki nunka no a sosodé.

Ounke ku el a bisa ku awor e tin duele i ke kuminsá di nobo, Ministerio Públiko ta di opinion ku, Ilias K. a kore deklará awor pa interes propio pa risibí un kastigu mas abou. Segun e fiskal, e sospechoso no ta duna ningun klaridat i ta ninga di duna deklarashon riba sierto persona. Pa e motibu aki e fiskal no ta mira ningun motibu pa suavisá e kastigu di prisòn pidi. Adishonalmente e defensa di djabièrnè tampoko no ta lag’e kambia di idea.

Segun e abogado defensor, Ilias K. no por papia mas tantu ya ku su famia ta menasa. E no ta haña ku un kastigu di bida largu ta na òrdu den e kaso aki. Dia 19 di yanüari 2022, Wes lo duna su desishon.