WILLEMSTAD.- Tin gruponan den e komunidat aki ku no ta entregá fásil i ta determiná pa sigui tene e isla aki limpi no opstante ku otronan ketu bai ta demostrá lo kontrario. Un dje gruponan ku sin mas ta determiná pa tene e isla aki limpi ta e grupo “Curaçao Moet Schoner” enkabesá pa ‘Kunuku Man’. T’asina ku e grupo di siudadanonan adelantá ta skohe un sitio pa nan bai limpia tur djadumingu. E djadumingu aki nan a skohe e aria di Marie Pampun.

E aria aki no tabata kompletamente limpi, aunke tin di rekonosé ku e playa i lugá di parker outo tabata nèchi. Banda di pir si tabatin muchu ko’i tira afó. A opta tambe pa piki sushi na ámbos banda dje karetera prinsipal i asina finalmente a kita 170 kilo di sushi fo’i kaminda.

Tur esnan ku ta karga e mesun determinashon aki i ta stima e isla aki lo por drenta den kontakto ku Kunuku Man via WhatsApp 692-5235.

Den kuadro di e aktividatnan aki EXTRA a sostené un kòmbersashon interesante ku sr. Michael de Jongh, i el a splika ku e grupo aki tin hopi tempu ta traha riba limpiesa di Kòrsou sin hasi muchu beheit. Adelantá ta skohe un sitio i di un manera silensioso nan ta akudí i hasi e parti di limpiesa. El a sigurá ku ta trata aki di un grupo determiná ku no ta entregá. Un grupo ku no ta buska publisidat, sino ku di nan forma ke yuda hala atenshon di komunidat te ora ku e mensahe penetrá i tin su influensia positivo.

Es mas, hopi dje fondonan ku e grupo aki ta bai pa aktividatnan i materialnan rondó dje mesun akshonnan di limpiesa. Por sierto, un parti grandi dje fondonan ta prosedente di entidatnan den eksterior. I entrante awe i pa e próksimo djalunanan EXTRA lo duna su granito dje forma aki pa yuda konsientisá pueblo.