WILLEMSTAD.- Manera EXTRA a informá siman pasá djaluna, nos ta sigui pa e próksimo simannan dunando informashon i relato di e akshonnan di limpiesa di Kunuku man i su tim. Tema di e akshon aki ta “Curaçao moet schoner”. Tur siman nan ta konsentrá riba un área i e siman aki a konsentrá riba Caracasbaaiweg na altura di Caribbean Cargo. Loke a rekohé e siman aki ta muchu mas ku siman pasá, 235 kilo di sushi.

Un tim super entusiasmá a reuní na altura di Caribbean Cargo riba Caracasbaaiweg i nan a limpia e kaya aki te na e entrada pa bai Montaña. I e otro banda di kaminda a sigui te na e entrada di Bai Brakkeput. Loke nan a konstatá ku e kantidat di sushi ku a rekohé ta ku hende ta benta òf laga hopi porkeria atras riba kaminda.

E tim a tuma na su enkargo pa tur siman riba djadumingu nan ta limpia un área di Kòrsou. I nan ta kere ku hende mester stòp di benta kos riba kaminda. No por!

Siman pasá e tim a limpia Marie Pampoen i nan a rekohé 170 kilo di sushi i e siman aki el a  bira 235 kilo di sushi den área di Caracasbaaiweg.

Kunuku man ta gradesí tur ku ayera a duna un man na e akshon di limpiesa i pa tur ku ke kooperá por app na  +59996925235.