WILLEMSTAD – Awe a pone beslag riba inventaris di PdVSA na Bullenbaai. A pone beslag riba kontenido di e tankinan.

Esaki tin di aber ku e kompania merikano ConocoPhillips ta di opinion ku nan tin derechi di mas ku 2.000 mion dòler for di kompania venezolano PdVSA, debí na un proseso di nashonalisashon di ConocoPhillips na Venezuela, mas ku 10 aña pasá.

Un korte internashonal resientemente a disidí ku PdVSA tin ku paga ConocoPhillips e montante astronómiko. Pa pone preshon riba PdVSA, i ku esaki forsa PdVSA pa paga e debe, ConocoPhillips a kuminsá ku un proseso hurídiko pa pone beslag riba vienes di PdVSA i vienes di kompanianan ku ta koperá ku PdVSA. Te ainda a pone beslag riba vienes na Kòrsou, Aruba, Boneiru i St. Eustatius.

Awe a pone beslag na kontenido di tankinan na Bullenbaai. Bosero di Refineria Earl Balborda awe a bisa ku nan no ta duna niun komentario riba e materia aki.