Partidonan a haña dos siman mas

WILEMSTAD.- Refineria di Kòrsou (RdK) ta anunsiá ku a yega na un akuerdo pa posponé entrega di e proposishon obligatorio  (Binding Proposal) a mas tarda 11 di desèmber 2020, na lugá di awe ku ta 27 di novèmber.

Anteriormente RdK a anunsiá ku pa fin di novèmber partidonan interesá den operá i manehá e refineria i COT lo mester entrega nan proposishon konkreto. Pero riba petishon di algun partido ku a sobra den e proseso importante aki pa Kòrsou, RdK a yega na un akuerdo pa posponé entrega di e proposishonnan obligatorio. E motibu prinsipal pa duna e partidonan mas tempu pa entregá un proposishon, ta pa brinda nan espasio pa por yega na proposishonnan mas balansá, hasi pregunta i formalisá nan “due diligence” i tambe laga partidonan ku a forma un konsorsio internashonal pa kaba di regla e último puntonan di akuerdo interno.

Despues di e fecha di entrega, aktualmente fihá riba 11 di Desèmber, e komishon di evaluashon lo tuma un siman pa evaluá i analisá tur e proposishonnan ku a drenta, pa despues presentá nan konseho final na gerensia, Hunta di Komisario di RdK i Konseho di Minister.

Pa mas tardá e di tres siman di Desèmber 2020, RdK lo informá ofisialmente ta kua ta e partido ku lo bai sigui negoshá kuné pa un akuerdo final.  Negosiashonnan lo inisiá mesora den Desèmber i ta premirá di lo kontinuá den Yanüari / Febrüari, pa logra sera akuerdonan entre RdK ku e partido selektá riba e modelo di partisipashon/ finansiamentu. Tambe lo sera akuerdo entre Gobièrnu ku e partido selektá riba kondishonnan pa manehá i operá e fasilidatnan petrolero di Kòrsou.

RdK lo kontinuá ku su esfuersonan pa sigui informá komunidat riba e proseso importante aki pa e industria petrolero di nos pais.