WILLEMSTAD.- Kunuku Man i su tim di boluntarionan no ta kansa, nan no ta entregá den e lucha kontra sushedat. Djadumingu último e tim di limpiesa aki un biaha mas a pasa riba e ruta di Caracasbaai. Finalmente nan a rekohé no ménos di 198 kilo di shushi. Nan a start for di rotònde di Janwe. Den promé instante kosnan tabata parse nèchi, pero semper semper tin shushi skondí den kual huki.

Durante e di 97 akshon di limpiesa aki nan a rekohé un kantidat di 605 bòter di glas (121 kilo); 300 bleki di aluminio (4 kilo); 320 bòter di plèstik (8 kilo). Tur esakinan a bai pa resiklahe. Tambe a piki shushi komun, ku tabata bon pa 65 kilo i si a bai pa landfill. Finalmente e loke a ser rekohé na sushi a totalisá 198 kilo.

Komo konseho Kunuku Man ke bisa tur hende ku na momentu ku nan ta subi kaya nan tin saku di plèstik pa hinka sushedat aden. No tira esakinan riba kaya, sino tira nan den Kliko ora ku yega kas. Si nos tur hasi esaki Kòrsou lo bira un tiki mas limpi. No lubidá ku ketu bai nos ta den e Aña di Limpiesa di Kòrsou.

Semper hendenan ku ta deseá di fungi komo boluntario pa yuda den limpiesa ta bon biní. Nan lo por yama i registrá na tel. 6925235.