WILLEMSTAD.- Habitantenan di Roi Santu ta trankil atrobe despues ku a limpia un pida tereno kual deskonosínan tabata a tuma komo kustumber pa tira sushi, partikularmente tayernan di outo ku ya no ta den uso. T’asina ku den nos edishon di dia 14 di òktober 2023 nos a informá di un kaso repudiabel di tiramentu di sushi ku a hasi e habitantenan dje bario aki hopi hostiná.

En e dianan ei na luna di òktober si tin habitantenan ku a gara nan ku tabata depositá un gran kantidat di tayer di outo i shushi riba un pida tereno ku den pasado a ser limpiá den e bario aki. Ta trata aki di un tereno ku den boka di pueblo ta yama “Seru di DOW”. Na e okashon ei EXTRA a kòmbersá ku algun dje habitantenan i mester bisa ku nan tabata furioso. Furioso den e sentido ku nan a pidi pa esun ku a bai basha tayer di outo bieu riba e tereno pa bin piki esakinan bèk, ya ku dado kaso esei no sosodé, nan mes lo a piki e tayernan i bai basha nan den porta dje lugá di drecha tayer for di unda nan a bin. A base di nan investigashonnan a haña sa tur detaye.

Segun e habitantenan, pa nan tin prueba di loke a sosodé, nan a saka foto i tambe algu di video pa asina gobièrnu ta na altura, i dje forma ei ta duna nan granito pa yuda tene e lugá aki limpi. Nan a akudí primeramente na warda di polis ku a referí nan pa “X-Team”, pero “X-Team” tabata fuera di funshon.

Pero e situashon a ser remediá despues di nos publikashon. EXTRA a komprondé ku e doño dje lugá di drecha tayer a ordená pa bai bèk na e tereno i rekohé tur e tayernan ku a ser bentá riba e tereno i depositá nan na landfill kaminda nan mester ta. Mester bisa ku práktikamente tur e tayernan a disparsé i asina tene e lugá limpi. Esaki ta un bon ehèmpel kon for di komunidat mes por duna informashon pa evitá ku kosnan fo’i regla ta sigui sosodé. Den e kaso aki asta a evitá ku nòmber di un negoshi ta ser manchá sin ta na nodi, ya ku esnan ku a kometé e akto aki a hasié riba nan mes.