WILLEMSTAD.- Ayera tabatin konmemorashon 3 di òktober kaminda ta rekordá ku a hasi un aña ku gobièrnu di Hulanda a rehabilitá Tula komo Héroe di tur hende, 3 di òktober 2023.
E programa di ayera ta basá riba tres suseso históriko trasendental i un lema kompakto i impaktante kual ta : Konmemorashon 229 Aña di e Morto Kruel di Tula ku a tuma lugá riba 3 di òktober 1795; Rehabilitashon di Tula komo Héroe Nashonal di e Digno Pueblo di Kòrsou ku a tuma lugá riba 17 di ougùstùs 2010; Selebrashon Un Aña ku Gobièrnu di Hulanda a rehabilitá Tula komo Héroe di nos tur, 3 di òktober 2023. E lema: ”2010: Tula, Héroe di Kòrsou. Awe: Tula, Héroe di Nos Tur!”. Ku e susesonan i e lema ariba menshoná, Asosiashon Promoshon Konsenshi Istóriko (APKI) ta organisá e e fecha históriko di morto i alabes rehabilitashon di Tula den Parke Lucha pa Libertat na Ref. Tantu e susesonan ariba menshoná komo e lema ta tira lus riba e proseso largu di lucha i emansipashon di pueblo di Kòrsou ku na dado momentu a kulminá den algun fecha i dekreto históriko masha importante i trasendental. APKI ta referí na: Dekreto 17 di ougùstùs 1984: Proklamashon ofisial di 17 di ougùstùs komo Dia di Lucha pa Libertat; Dekreto di 17 di ougùstùs 2010 di Kolegio Ehekutivo di Teritorio Insular di Kòrsou: rehabilitashon di tur e luchadónan pa libertat; Dekreto di 17 di ougùstùs 2010 di Kolegio Ehekutivo di Teritorio Insular di Kòrsou: Proklamashon di Tula komo héroe nashonal di e digno pueblo di Kòrsou; Moshon di 19 di ougùstùs 2010: akseptashon unánime den reunion públiko di Konseho Insular di Kòrsou pa rekonfirmá e proklamashon di Tula komo héroe nashonal di e digno pueblo di Kòrsou i pa rekonfirmá alabes e rehabilitashon di e luchadónan pa libertat di 1795, komo hòmber i muhé di honor i bon nòmber; Dekreto di 17 di ougùstùs 2017 di Minister Presidente di Kòrsou Pais Outónomo: konfirmashon ofisial di e proklamashon di Tula komo héroe nashonal di e digno pueblo di Kòrsou i e Resolushon pa rehabilitá tur e luchadónan pa libertat; Dekreto di 3 di òktober 2023: Riba e fecha akí Gobièrnu di Hulanda a rehabilitá tur e luchadónan pa libertat i a proklamá Tula komo “Héroe di Nos Tur”.
Durante di e konmemorashon ayera tres finalista di Festival Bos di Libertat 2023 lo presentá e kansionnan komponé spesialmente na okashon di Konmemorashon 160 Aña Abolishon di Sklabitut den Reino Hulandes. Ta trata akí di e ganadó apsoluto Veanira Booy-Reed, e promé finalista Moises Ramos i e di kuater finalista Surelma Curiel-Miguel “Lady Su”. Tabatin presentashon di Grupo di baile D’Art, deklamashon di poesia di Tyrone Brunken i presentashon di Grupo Rítmiko ORIRÍ.
E reflekshon spiritual ta na enkargo di señor Armin Elisa, un laiko katóliko masha komprometé ku e kousa. Tabatin diskurso di Minister di Enseñansa, Siensia, Kultura i Deporte señor Sithree van Heydoorn, presidente di Fundashon Parke Nashonal drs. Lionel Janga i un hóben di Fundashon Arte di Palabra, Ivanson Monte.