WILLEMSTAD.- Marina ulandes ta informá ku a saka e helikòpter NH90, ku dia 19 di yüli a disparsé den laman den Region Karibe. A saka e helikòpter na dos pida for di fondo di laman den dianan tras di lomba.

NH90

E parti di e rabu i e bòdi ta yega den haf di Kòrsou awe mèrdia pa despues transportá nan ku  barku pa Ulanda. Einan na fin di e luna aki nan lo keda transferí pa ‘Inspectie Veiligheid Defensie (IVD)’ (Inspekshon di Seguridat di Defensa). Nan lo hasi investigashon tokante e kousa di e aksidente.

Ku yudansa di e barku Volantis i un robòt supmarino, ‘Maritime Capacity Alliance’ a ehersé e reskate. E ekipo sivil-militar  tabata konsistí di téknikonan di helikòpter di Defensa i spesialistanan di reskate Sivil.

Prome a saka e parti di e rabu ku un kran grandi di e barku di reskate. Esei tabata ubiká na mas o ménos 450 meter di profundidat, alrededor di 12 kilometer pafó di kosta di Aruba. Ku yudansa di e robòt supmarino a hasi uso di kabelnan pa subi e restunan di e aeronave.

E bòdi ku na promé instansha ainda tabata drif, tabata ubiká mas o ménos 100 kilometer mas leu, den awanan di Venezuela, na kasi 1,5 kilometer di profundidat. E parti aki a keda saká ku un tipo di skòp grandi, den kua e restunan tabata pas presis. A baha e asina yamá ‘cradle’ di 17 x 15 meter den fondo di laman  via di e kran di Volantis. E parti abou di e skòp ta ekipá ku un skrin di waya. Di e forma aki por a saka tur e pida pida nan di e helikòpter ku lo por a los.

E operashon pa saka e helikòpter a keda ehersé den presensia di un Inspektor di IVD. Manera ta konosí 2 miembro di tripulashon a pèrdè nan bida den e aksidente aki.