WILLEMSTAD.- Ayera Reshèrshi di bario di Punda huntu ku e Tim di Polis èkstra ordinario ku ta enkargá ku kuido di bestia, tabatin un kontròl den e barionan den área di Punda.

E kontròl tabata nesesario pa e kantidat di reklamonan ku ta yega ofisina di Polis relashoná ku molèster i tambe loke ku ta keda konsiderá komo maltrato severo di bestia, den e kaso aki kachónan.

Ayera e tim a subi kaya i a realisá e kontròlnan i a duna vários atvertensia, pa kachónan ku ta mará, kachó klaramente deskuidá, esta kachónan sin ta haña kuminda i nada di awa. Mester enfatisá ku kachó na kadena ta kontra di lei.

Tabatin atvertensia pa kachónan ku ta grita henter anochi molestiá bisiña. Hopi biaha un kachó ta grita henter anochi ta pa motibu ku e ta den un situashon inkómodo i ta pidi atenshon. Por ehèmpel, un kachó ku ta mará henter dia, anochi lo grita buskando atenshon. Si lòs e kachó e ta stòp di grita. Esakinan ta e konsehonan ku a duna e doño(nan) di kachó.

Pelea di gai

A kontrolá tambe molèster relashoná ku pelea di gai, e último aki ta kontra di lei.

Tin hende ta organisá pelea di gai den barionan abitá i ta sòru pa basta molèster pa bisiñanan.

Akinan tambe a atendé ku e doñonan di gai i organisadó di pelea di gai. E loke ku ta remarkabel ta ku den último tempunan pelea di gai a lanta kabes pisá aki na Kòrsou i Polis tin atenshon pa e desaroyo negativo aki. Ayera despues di e atvertensianan duná, polis lo no bai tolerá pelea di gai mas. Esaki sa tuma lugá den área di Marie Pampoen.

Pa loke ta trata e atvertensianan pa e doñonan di kachó, a haña un luna di tempu pa resolvé tur e loke ku ta sòru pa molèster i si esaki no ta na òrdu aki un luna, lo start e prosedura pa hiba e doñonan di kachó aki korte.

E kontròlnan aki ta kontinuá.