WILLEMSTAD.-  Esun ku ta pasa den bisindario di Kolegio St. Thomas bieu, banda di SEHOS, por mira ku a remplasá e bentananan kolorido ‘glas-in-lood’ ku plachi di palu. Riba inisiativa di eksperto di arte i herensia, Gerda Gehlen, i den kolaborashon ku Prins Bernhard Cultuurfonds, Stichting Monumentenzorg Curaçao i Caribbean Maintenance Developers a skapa diesun bentana glas-in-lood di e edifisio ku tin basta aña pará bashí i ku ta den mal estado.

Pa mantené e bentananan úniko pa futuro, e kompania di konstrukshon CMD a kita nan na un manera hopi kouteloso for di parti paden di e skol i a warda nan den kaha di palu. Bou di ouspisio di Stichting Monumentenzorg Curaçao a transportá e kahanan pa un mangasina, kaminda nan lo keda wardá te ora por restorá nan i instalá nan di nobo na Kolegio St. Thomas dia ku esei keda restorá. E kitamentu i e transporte di e bentananan glas-in-lood a keda realisá ku sosten finansiero di Prins Bernhard Cultuurfonds Caribisch Gebied.

Kolegio St. Thomas ‘bieu’ ta eksistí for di fin di siglo 19. E fraternan di Tilburg a us’é komo skol di mucha hòmber. E bentananan glas-in-lood ta mustra ilustrashonnan di símbolo i santunan katóliko, manera patron di e kolegio San Thomas de Aquino. Na sierto momentu e skol a muda pa su edifisio nobo na L.B. Smithplein. E kolegio ‘bieu’ di St. Thomas tabatin diferente otro funshon despues. Entre otro el a ubiká IFE, Akademia di Arte i Kolegio di Lei. For di fin di siglo 20 e edifisio ta pará bashí i ei su deterioro a kuminsá.

Den e kapia bieu e kozeinnan a bira asina putrí ku tabatin peliger ku e bentananan por a kai for di nan i kibra por kompletu. Esei a kuminsá tuma lugá kaba, manera den e kaso di un pènel ku a kai for di e bentana grandi mei mei di e fachada. Ainda no ta konosí ki dia lo kuminsá ku  restorashon di e konstrukshon monumental, pero manera esaki tuma lugá, por pone e pènelnan drechá bèk na nan lugá anterior den e edifisio, pa asina un bes mas nan influensiá e ambiente ekstraordinario di e kolegio pa futuro generashonnan.