WILLEMSTAD.- E tim multidisiplinario konsistiendo di MEO, BAB, GMN (Inspekshon di medisina) a presentá na e establesimentu ku yama Anna’s Tiger ku ta keda riba Gosieweg pa asina tene un kòntròl.
E kòntròl aki a tuma lugá despues di haña un tip ku den e establesimentu aki kual ku ta bende produktonan di “Body Building” lo mester ta duna e servisio di inyektá pues pasa angua tambe pa personanan ku tin problema ku sobr’e peso i mas.
E persona ku ta hasi esaki no tin e pèrmitnan nesesario pa hasi e tipo di trabounan i tratamentunan aki.
Na yegada di e tim a konstatá anguanan ya uza kaba den baki di sushi kual e doño di e lugá a duna di konosé ku nan a wòrdu uza pa su propio uzo.
Pero apesar ku segun e doño ta pa su propio uso, tòg e tin un diploma pega den e negoshi ku ta indiká ku el a terminá un ke otro kurso ku tin di aber ku e tratamentu ei.
A konstatá tambe bòternan di e líkido “Alcachofa” kual ta wòrdu inyektá i uza pa kima vèt den kurpa di hende.
E personal di inspekshon di medisina a konfiská tur esakinan mirando ku pa e tipo di produkto aki bo mester tin un pèrmit spesial.
Aparte di esakinan, e doño no tin e pèrmit nesesario pa ta hasi tipo di tratamentunan aki tampoko.
E lugá mes no ta dispone di un kaha di BAB i tampoko di e pèrmitnan nesesario pa ta operá komo un establesimentu.
Despues di e kòntròl ku a tuma lugá e tim multidisiplinario a tuma e desishon konhuntamente pa a sera e lugá te na momentu ku e doño por demostrá tur e pèrmitnan nesesario pa por operá di un forma legal.