‘Despues di reunion di djabièrnè kos ta bai sinta’

WILLEMSTAD.- Despues di e di dos reunion den e órgano tripartit Diálogo Nashonal ku ta tuma lugá otro siman djabièrnè kaminda lo eksigí informashon mas detayá riba e dilnan ku Refineria di Kòrsou (RdK) a firma ku kompanianan Oryx Midstream i Global Oil,  gremionan sindikal i komersial por fiha un posishon konhunto mucha mas skèrpi. “despues di e reunion di djabièrnè kosnan ta bai sinta”, Miembro di direktiva di CGTC, Kenneth ta deklará.

Djaweps último sentralnan sindikal SSS, SSK i CGTC a reuní den un un enkuentro bilateral ku asosashon di komersio i industria, VBC. Valpoort ta bisa ku kada organisashon a trese nan punto di bista dilanti a base di e reunion ku a tuma lugá 2 ougùstùs.

Den e reunion dia 2 di ougùstùs tabata minister Charles Cooper ku a duna algun informashon general den e reunion tripartit. “Tabata informashon general i no a bai den detaye riba e akuerdonan ku RdK a sera ku Global Oil i Oryx Midstream.”

Pa e motibu aki tambe den e evaluashon den e reunion di djaweps kada organisashon a duna nan punto di bista general riba e reunion, pero no ku a fiha un posishon komun ainda, Valpoort ta splika. “Loke si por bisa ta ku e splikashon ku a risibí no a konvensé niun di e partnernan sosial.”

Esaki ta un di e motibunan ku partnernan sosial a eksigí pa RdK ta presente den e di dos reunion di Diálogo Nashonal otro siman djabièrnè riba futuro di refineria i akuerdonan ku RdK a sera ku kompanianan Oryx Midstream i Global Oil. Pa e reunion aki a pidi minister di Desaroyo Sosial, Labor i Bienestar, Ruthmilda Larmonie-Cecilia pa invitá gerensia di RdK pa te presente pa duna mas informashon.

“Den e reunion aki lo wak ki informashon mas ta subi mesa pa asina partnernan sosial por fiha un posishon mas konkreto. Tambe lo wak si e sentralnan sindikal i VBC ta yega na un posishon komun riba e desaroyonan den e sektor energétiko.”

Tambe a firma den e reunion di djaweps e vershon definitivo di e protokòl di konsulta bilateral entre gremionan sindikal i komersial. Valpoort ta bisa ku un di e metanan prinsipal di e protokòl ta pa apesar ku kada un di e gremionan tin nan propio posishon riba diferente tópikonan di interes general, esaki no ta nifiká ku nan mester ta dividí.

Ku konsulta regular por trata na yega na  konsenso ku otro. Otro meta ku e protokòl ta sirbi ta pa ora e konsultanan tripartit kai afó manera a tuma lugá durante último 9 luna, ku gremionan sindikal i komersial ta keda reuní riba puntonan di interes general.