WILLEMSTAD.- Si tin un doló di kabes ku kada minister i gobièrnu di turno ta haña nan mes konfrontá kuné, anto ta e problema di ámtenarnan sintá na kas ta kobra sea pasobra nan ta malu òf riba non-aktief pa hopi aña. Durante e periodo di gobernashon di sr. Armin Konket den su kalidat di titular di BPD el a enfoká hopi riba alsa produktividat dor di atendé ku urgensia e problemátika di empleadonan públiko ku pa un òf otro motibu ta sintá na kas sin traha. Asina el a duna di konosé na EXTRA.

Segun e mandatario, aktualmente tin 33 di e kasonan aki registrá. Gobièrnu a logra pa den e periodo aki di gobernashon redusí e lista ku 168 kaso. E esfuersonan a kuminsá na 2014. Di 2014 pa 2020 a redusí e lista ku 215 kaso di kua 134 a haña retiro (ongeschiktheid, willekeurig verbreken dienstverband, ongeoorloofd verzuim, afgekeurd langdurige zieken, disciplinair) i 74 a reanudá trabou.

E 7 sobra nan ta trata di persona nan ku a fayesé. Pues tin ménos ku 1% di e di empleadonan públiko ku pa un òf otro motibu ta sintá na kas sin traha. E 33 kasonan ku tin registrá aktualmente ta trata kasonan disiplinario di kua mayoria ta den kuadro di un trayekto penal i ta pendiente tratamentu den Korte di Hustisia. Demas kasonan ta trata ámtenarnan ku tin malesa i ku ta keda atendé den konsulta ku ARBO.

Segun sr. Konket, den e kuadro aki por hasi menshon tambe di e trayekto di VVU ku meta pa subi produktividat den aparato públiko. Tin mas ku 600 ámtenar ku interes pa VVU. Ehekushon di e trayekto aki ta krea espasio pa kambio di funshon I tambe krea espasio pa 200 profeshonal hóben. E trayekto di VVU lo keda implementá durante e periodo di gobernashon aki.