WILLEMSTAD.- Gobièrnu di Kòrsou ta bai start ku e proseso pa yega na un emblema nobo pa Pais Kòrsou. Esaki tambe ta un parti importante riba e trayekto di ‘nation building’ awor ku nos tin un pais ku un status outónomo den Reino. Es mas, kada ken den e pais aki por partisipá i ta kontribuí na patriotismo. Asina Promé Minister di Kòrsou sr. Eugene Rhuggenaath a duna di konosé durante un enkuentro ku prensa ayera tardi. Segun e mandatario, t’asina ku gobièrnu a tuma e desishon pa krea un emblema nashonal nobo pa Kòrsou. E emblema aki lo tin di bai remplasá e eskudo ku Pais Kòrsou ta usando te ainda i ku ta data for di e époka di Teritorio Insular di Kòrsou. El a hasi un yamada pa huntu ban na diseñá un emblema pa Kòrsou ku ta nos nashon i ku tin e meta prinsipal pa representá nos pais, uni nos siudadanonan i krea un sentido di patriotismo, i mas ku esei un orguyo profundo di ken nos ta, di unda nos ta bin, kua pais nos ta den region i den mundu.

E emblema nobo aki lo tin di proyektá i reflehá nos kultura, nos prinsipionan, nos historia pero tambe nos talento i e ambishonnan komun di un forma konstruktivo i ku ta empoderá i ku ta rekonosibel a nos siudadanonan. Pues algu ku ta di nos i ku ta representá nos.

Un emblema nobo ta forma parti di e trayekto tan importante di konstrukshon di un nashon (nation building) den kua kada un di nos por identifiká nos mes i ku ta reflehá nos kultura riku i diverso. Esaki ta parti di un maneho i parti di un proseso partisipativo pa a yega na un plan nashonal. Pueblo a disidí ku nos identidat nashonal mester ta un kapítulo riba su mes.

Identidat ta hunga un ròl grandi den nos desaroyo propio, miéntras ku un símbolo nashonal ta algu di gran balor pa komunidat.

Segun sr. Rhuggenaath, pa progreso di nos isla ta hopi importante pa nos rekonosé di unda nos ta bin, ken nos ta i kon nos ta sigui huntu padilanti. Ta trata aki di un trayekto di término largu i ku lo ser implementá den fase. I awor netamente den un momentu di krísis esaki ta algu importante pa nos por yega mas serka di otro dor di huntu krea un emblema ku ta un símbolo di nos pais i ku ta representá nos tur. Prueba di esei ta ku den e periodo di COVID-19 nos tabata unu.

Den e kaso aki dje emblema, atraves di un kompetensia lo bo haña e oportunidat di bini ku bo diseño, i despues kada ken lo haña e oportunidat pa vota pa nan diseño preferí. Lo bai tin un komishon ku ta konsistí di siudadanonan i ekspertonan riba aria di kultura, diseño i historia, i nan lo hasi un eskoho for di e diseñonan mas skohé pa komunidat. I finalmente lo saka un ganadó a base di kriterionan stipulá. Por kompará e proseso aki ku e tempu ku a skohe bandera di Kòrsou, pa medio di un proseso partisipativo.