Toque de queda ta kambia pa 12’or nochi

WILLEMSTAD.-Un informashon ku gran mayoria di hende tabata pendiente di dje ta e desishon di gobièrnu pa loke ta trata medidanan di protekshon kontra di Covid-9. Premier Eugene Rhuggenaath a duna di konosé ku ta suavisá e medidanan ku aktualmente na vigor kumindando mayan djabièrnè 26 di febrüari anto e medidanan ta suavisá te ku 8 di mart próksimo, pues suavisashon pa 10 dia.

Pa kuminsá e ‘toque de queda’, ku aktualmente ta kuminsá 11’or anochi, den e regla nobo ‘toque de queda’ ta konta di 12’or anochi pa 4:30 di mainta. Tambe premier a informa ku empresanan por keda habrí te ku 11’or di anochi, òf te e ora ku e pèrmit ta konta. Ku otro palabra si un hende su pèrmit ekonómiko ta bisa ku mester sera promé ku 11’or ta nifiká ku  mester kumpli ku su pèrmit. E orario nobo no ta konta pa botika na warda i otro institutonan den kuido.

Pa loke ta trata trùk di pan e regla nobo ta indiká ku e trùk di pan mester operá entre 7’or anochi pa 11’or anochi.  Gobièrnu a reuní ku Gaming Control Board i  a yega na e desishon ku tur medida di kontrol den kasino ta keda na vigor. Kasinonan por keda habrí te 11’or anochi. Ta elimina e prohibishon pa sirbi aklohol den kasino.

Eventonan deportivo por risibi publiko parsialmente, te un maksimo di 50% di e kapasidat. Ta deskonseha musika duru na eventonan deportivo. Eventonan paden si te ainda no por tin publiko. E pais aki ta na un krusada importante i komo komunidat mester rekonose, esei. Ta importante ekspresa gratitut, Korsou ta bayendo bon pero nos no a yega ainda i p’esei mester sigui hasi esfuerso.