WILLEMSTAD.- Gerensia di SDKK (prisòn) a tuma nota ku e kasonan rondó di Corona Vírus a subi na Kòrsou despues di djabièrnè último. Konsiderando ku Gerensia ta responsabel pa tantu personal komo detenidonan di SDKK, Gerensia ta obligá pa hasi su máksimo esfuerso pa e Corona Vírus no drenta SDKK i afektá nos. Den e kaso aki prevenshon ta e punto mas prinsipal pa Gerensia.

Pa por minimalisá e riesgonan, Gerensia ta baha e kantidat di persona ku ta drenta SDKK. Entrante awe djamars dia 17 di mart 2020 te ku dia 5 di aprel 2020 ta;

suspendé bishita di detenidonan;

stòp presensia den prizòn i trabounan di Stazjèr i tur ‘rondleiding’;

stòp tur e aktividatnan di resosialisashon;

stòp tur aktividat kaminda detenidonan tin ku traha pafó di prizòn;

para tur training di personal, tantu paden i pafó di prizòn.

Konsiderando ku ta un situashon di emergensia i ku no ta falta di detenidonan ku ta para aktividatnan di trabou, lo sigui paga tur detenido komo si fuera ku e la traha durante di e dianan ariba menshoná.

Gerensia ta pidi komprenshon pa inkumbiniensia ku ta ser kousa i lo sigui duna informashon durante di e dianan ku ta sigui.