WILLEMSTAD.- Korte di promé instansia ayera a trata otro kaso di inmoralidat kontra un menor di edat pro forma. Esaki debí ku ainda e investigashonnan no ta kla.
Ministerio Públiko ta akusá e hòmber W.R. (36) nasé na República Dominicana di a kometé e akto ku su propio yu muhé di 11 aña.
Segun e akusashon dia 1e di mart 2021 e akusado lo a kometé aktonan seksual den tur sentido di palabra ku su yu.
E akusado a ninga e akusashon redondamente i ta para riba ku esei no ta kuadra ku bèrdat.
Fiskal a bisa ku despues di un di dos investigashon ku nan a laga hasi, dòkter a traha un rapòrt i a indiká ku durante un análisis ku nan a hasi ku e menor a haña sanger den kanal di su matris.
E dòkter a bisa ku esei por ta konsekuensia di menstruashon.
Esaki a pone ku fiskal a manda e pruebanan na instituto di NFI pa hasi mas investigashon. E akusado ta keda insistí ku e ta inosente.
Segun fiskal, e kos di mas fèrfelu ta ku e akusado mester keda será mas ku 3 luna, pasó NFI ta bai tarda hopi pa manda e resultadonan.
Mirando esaki Ministerio Públiko no a bai kontra pa suspendé detenshon di e akusado. Fiskal a bisa e akusado por bai kas pa warda investigashon terminá, solamente bou di kondishonnan hopi estrikto. Komo kondishon e mester keda leu for di kas di su kasa i e víktima i mag di tin kontakto ku nan den niun manera.
Por último e akusado a yora bisando: “Mi stima mi yu, nunka ma mira mi yu ku deseo. Mi ke mira mi yu krese i ke ta un bon tata pa mi yu. Mama di mi otro yunan tambe ma pasa den kosnan fèrfelu, pero el a bai Hulanda ku nan sin mi por a hasi nada”.
Hues den su desishon despues di a bai deliberá a bai kompletamente di akuerdo ku fiskal. Hues a splika e akusado ku e tin ku tene su mes estriktamente na e kondishonnan. E kaso a keda posponé pa sèptèmber binidero.