WILLEMSTAD.- A tarda muchu pa kuminsá buska finansiamentu pa ekseso di presupuesto pa konstrukshon di hospital nobo. Esaki ta loke ku Kontraloria General den nan rapòrt riba investigashon di konstrukshon di hospital a indiká. Den e kapítulo di “por garantisá operashon sostenibel di e hospital nobo, Kontraloria General ta konkluí ku Pais no a studia na tempu kua ta e medidanan di redukshon di gastu ku tabata faktibel pa tuma den área di salubridat i debí na esei no por a tuma medida na tempu pa realisá e redukshon di gastu. Aunke no a prepará niun aktualisashon di e “business case” for di mei 2014 te ku òktober 2018, den e periodo ei tabatin sufisiente
indikashon di ku probablemente lo eksedé e suma di invershon i ku, ademas, por a spera un défisit operashonal supstansial den futuro. Por ehèmpel, for di 2015, bes tras bes a bin padilanti ku tin ekseso di e presupuesto di invershon, di entre NAf. 72 mion i 200 mion.
E promé proyekshon di e défisit operashonal, na fin di 2017, tabata di NAf. 49 mion, siguí pa un otro proyekshon, na yüni 2018, di NAf. 59 mion. En todo kaso, en espera di un “business case” aktualisá, Gobièrnu por a laga investigá ki medida di redukshon di gastu lo por a tuma i kuminsá implementá e medidanan ku Gobièrnu opta p’e.
Mas aleu Kontraloria General a konkluí ku no a tene sufisiente kuenta ku e retraso usual ku tin entre implementashon di un medida i su resultadonan, i e efekto akí a ser amplifiká tambe debí na e echo ku a trata aki di medida ku tabatin konsekuensia supstansial pa diferente partido, entre otro e spesialistanan. P’esei mes por bisa ku e ekonomisashon obligatorio di NAf. 70 mion den e promé aña di ehekushon tabata muchu optimista i tabata di spera ku e ekonomisashon proyektá pa 2020 (NAf. 23 mion) lo a kana atras kompará ku e ophetivo.
En bista di e indikashonnan ku tabatin for di trempan, a tarda muchu pa kuminsá buska finansiamentu pa e ekseso di presupuesto di invershon ku a ser premirá. Ademas, ta te ora ku e fondonan optené via e bononan emití anteriormente a kasi agotá, a kuminsá hasi esfuerso mas intensivo. Debí na esei, pa basta tempu, tabatin insertidumbre enkuanto si lo logra kompletá e proyekto (na tempu).
Pa e hospital por operá na un manera sostenibel, e medidanan di redukshon di gastu mester ta sufisiente pa kubri e gastunan operashonal èkstra. Ya ku no ta parse masha probabel ku e medidanan di redukshon di gastu lo ta sufisiente, e chèns ta grandi ku operashon sostenibel di e hospital lo no ta faktibel, a ménos ku identifiká i implementá medida adishonal pa redusí gastu.
I en bista di resultado di e investigashon relativamente resien, di 2019, pa identifiká opshon pa redukshon di gastu, e chèns ta grandi ku no a sobra mas opshon pa baha gastu i ku ta Pais, pues tambe e pagadó
di impuesto, lo tin di karga e gastunan operashonal èkstra di e hospital nobo.
Apesar di e insertidumbre tokante kuantu mas haltu e gastunan operashonal ta, en bista di e sifranan menshoná te asina leu, por spera ku ta trata aki di miónes.
Pa por determiná embergadura di e posibel medidanan adishonal ku lo tuma pa redusí gastu, mester haña un bista, mas pronto posibel, di kuantu mas haltu e gastunan operashonal ta segun e proyekshonnan aktual. Ademas, pa e kálkulo ei por ta mas eksakto posibel, mester determiná e suma di invershon definitivo i fiha e kondishonnan bou di kua Pais lo pasa e hospital nobo pa HNO VB, segun Kontraloria General.