PHILIPSBURG.- E variante di India ku tabatin interogante rondó di dje a bin resultá di ta na St. Maarten. Esei por a komprondé for di informashonnan prosedente dje isla aki. Manera ta konosí e siman aki a surgi informashon for di Hulanda ku riba un dje islanan di Reino den Karibe lo a topa ku e variante Indio. Aki na Kòrsou a desmentí esei, pero awor a bin sali na kla ku ta na St. Maarten. T’asina ku Collective Prevention Service (CPS) di e Ministerio di Salubridat Públiko i Desaroyo Sosial a konfirmá ku nan a topa ku un kaso dje variante Indio di COVID-19.

Basá riba e último informashonnan, e variante Indio aki lo por ta responsabel pa un eksploshon den kasonan di COVID-19 na India i tambe na e pais bisiña Pakistan. Komo un medida di prevenshon tantu India komo Pakistan a ser poné riba e lista di paisnan di alto riesgo for di 20 di aprel 2021.

Den kolaborashon ku laboratorionan lokal i e Instituto Hulandes Nashonal di Salubridat Públiko i Medioambiente (RIVM), a manda muestranan di algun tèst ku a ser hasí pa e tèst genétiko. E muestranan tabata di e último dos siman den e kaso aki 93% dje resultadonan tabata di e variante Britániko, 5% tabata dje variante di New York i unu (1) tabata di e variante Indio.

Ku diferente variante di COVID-19 sirkulando riba e isla aki, CPS ta hasi un yamada riba tur hende pa nan  sigui ser responsabel i sigui e medidanan anunsiá dor di outoridatnan kual ta yuda mantené e kasonan na un nivel ku ta manehabel. Sigui bisti tapaboka, laba man, tene distansia sosial.

Den e mesun rosea mester bisa ku vakuna ta un medio krítiko den e lucha aki kontra e vírus, i tin di bisa ku tin benefishinan opvio na momentu ku un persona vakuná. Es mas, miembronan di e komunidat di St. Maarten ta ser rekordá pa nan registrá pa por risibí e vakuna. A krea asta e posibilidat di kana drenta (walk in) pa vakuná na e sitio di CPS na Vineyard Office Park na Philipsburg.

T’asina ku resientemente aki na Kòrsou a nenga ku e variante di India lo a marka su presensia kaba, esei pa motibu ku outoridatnan lokal no a ser informá di nada. Segun nos eksperto prinsipal, dr. Izzy Gerstenbluth, no ta konosí si mester preokupá muchu ku e variante aki komo ku no tin hopi informashon riba dje. Na India unda tin hopi hende ta biba riba otro i esaki ta un kondishon ideal pa e vírus por infektá mas hende i asina e plama ku mas rapides.