WILLEMSTAD.-Awe mainta ministernan Charles Cooper i Ruisandro Cijntje tabata na Curaçao International Airport pa un okashon hopi spesial. Na Hato a risibí e promé buelo di un drone ku a trese un kargamentu di sanger for di Banko di Sanger na Otrobanda. Tabata presente representantenan di Banko di Sanger tambe huntu ku prensa.

Luigi Sille di Banko Sanger a bisa ku esaki ta algu grandi pa Kòrsou pasobra esaki ta e futuro. Ta praktikamente tur dia tin interkambio di Banko di Sanger di Kòrsou ku hospital di Boneiru Fundashon Maria Dal i tambe e hospitalnan na Aruba i Sint Maarten. Banko di Sanger semper ta para positivo pa kambio i pa salba bida.

Minister Cooper enkargá ku aviashon a bisa ku esaki ta algu históriko pa Kòrsou kaminda for di Otrobanda e drone a lanta ku sanger i baha na Hato. Esaki ta futuro kaminda aviashon ta tuma lugá sin hende físikamente den e aparato. Cooper ta mira esaki komo un paso importante den futuro di transporte entre islanan ABC. Esaki ta un sistema fásil i efisiente pa transporte e.o di sanger i otro produktonan farmaseutiko. Esaki ta un proyekto piloto pasobra den futuro esaki lo bira un industria, kaminda via di vehíkulonan di e tipo aki ta atendé transporte. Esaki tambe ta e piloto pa vuelonan eléktriko den aviashon, pues Kòrsou ta dal paso importante den direkshon di teknologia moderno. Tur detaye den edishon di EXTRA.