WILLEMSTAD.- Ayera hues Snitker a tene kompashon ku e pareha R.G i E.C. dor di duna nan kastigu kondishonal.

Ámbos ta keda akusá di a trata na  eksportá 1035 i 500 gram di koka pa Boneiru dia 6 di yüli último.

Na momento ku nan a yega Hato, e personal di duana a nota ku nan tabata kanando straño.

Ora  ku a listra e hòmber mas profundo, nan a fula algu duru na su pechu.

A pon’é hisa su suèter di kual nan a mira ku e tabatin algun pakete di plak na su kurpa ku a resultá di tabata koka kual a pisa un total di 1035 gram.

Ora ku a disidí di listra su pareha, e tambe tabatin paketenan di plak na su kurpa ku a resultá  un total di 500 gram di koka.

Segun E.C. e tabatin mester di sèn pa manda pa su yu na Hulanda.

Ámbos a pèrdè trabou i p’esei el a disidí di aseptá e oferta di pasa droga pa su primu. E ta esun ku ta sòru pa e dama i e kas kompletu.

Su primu a dun’e e paketenan di droga i e mes a plak nan na tantu su kurpa komo di e dama. Tambe el a bisa ku ta e mes a kumpra su pasashi. Despues di e suseso el a bisa ku nunka mas nan no a tende di e primu.

Na polis i ayera den korte, el a deklará ku e tabata sa ku e tabata transportando droga. El a bisa ku awor e tin trabou i ta sòru atrobe pa su kas i tambe e dama.

Hues a indiká na e akusado, ku na komienso di aña 2015 tambe el a wòrdu kondená pa droga.

Rapòrt di Reclassering a duna di konosé ku e señora su nivel di inteligensia ta hopi abou i fásilmente e por bolbe kai den tentashon si e wòrdu influensia.

Pero segun e rapòrt mas aleu, e por distinguí e bon for di e malu i tambe a atmití ku e sa ku el a hasi algu robes.

Mirando esaki fiskal a yega na e demanda di 20 luna di kual 10 kondishonal pa e akusado E.C. mas 240 ora di trabou pa komunidat.

Pa loke ta trata e dama, fiskal a yega na un demanda di 6 luna kompletamente kondishonal mas 180 ora di trabou pa komunidat.

Abogado Marije Vaders a indiká ku e ta haña ku tin ku apsolvé e akusado femenino kompletamente for di kulpa, mirando ku e ta un persona ku grado di inteligensia di mas abou ku ta un problema intelektual.

Segun e abogado, e dama tin 9 aña bou di guia di e tim di SGR groep i e no ta kompletamente responsabel pa su aktonan. E tin mente di un mucha di 6 aña.

Hues den su desishon a bisa ku e ta bai duna e akusado E.C. un chèns mas mirando ku e tin un trabou awor i tambe ku el a atmití su kulpa. Pa loke ta trata e dama, hues a bisa ku aunke e rapòrtnan ta bisa ku e por distinguí e bon for di e malu, hues ta desviá un tiki for di e demanda.

Mirando tur esakinan hues a yega na 6 luna kompletamente kondishonal pa e dama, guia di Reclassering, training i 80 ora di trabou pa komunidat.

Pa loke ta trata e akusado E.C., hues ta desviá for di e demanda di fiskal i a konden’é na 12 luna kompletamente kondishonal, mas 240 ora di trabou pa komunidat.