WILLEMSTAD.- Ayera mèrdia e departamento ku ta atendé ku kontròl di kuido di muchanan despues di skol (krèsh, opvang” di OWCS, Polis i tambe MEO a bai na un adrès ku ta keda na Kaya Dalpega.

Esaki despues ku ya tabatin algun dia vigilando e adrès aki. A risibí informashon algun dia promé ku na e adrès aki mester tin kuido di mucha tumando lugá despues di skol pero ku e sitio no ta niun tiki apropiá i ta laga hopi di deseá.

Hefe di e Departamento di Inspekshon Ekonómiko Ronny Cornelis a indiká na EXTRA ku e sitio ta sushi i ta hopi insigur pa mucha.

Na yegada di e funshonarionan a komprondé ku e persona ku ta responsabel pa e “opvang” mes no taba’tei. Debí ku e mester a bai un entiero niun mucha no taba’tei ayera. Ku pèrmit di doño di e kas ku ta biba parti dilanti, e funshonarionan a kana den e área parti patras di e kas prinsipal kaminda ta atendé ku e muchanan, i nan no por a kere nan bista lokual nan tabata mira. E sitio tabata unu hopi sushi i hopi insigur.

Cornelis a indiká ku ta inkomprendibel kon por ta atendé ku mucha den un ambiente asina.

“A base di prueba a tuma akshon”

E persona ku ta responsabel pa e “opvang” aki no a keda muchu kontentu ku e relato di EXTRA riba ret sosial i a tuma kontakto ku nos via di nos ret sosial. E persona aki a indiká ku no ta bèrdat ku e ta operá un “opvang” i ku nada ta kuadra ku bèrdat.

Riba esaki Cornelis a bolbe konfirmá pa EXTRA; “Na e sitio tin “opvang” i tin prueba di esei”. Doño di e kas i tambe un familiar di e persona aki mes a konfirmá na e funshonarionan tur kos i a indiká kon e persona responsabel pa e “opvang” mes sa kore buska e muchanan na skol. Manera ya indiká e funshonarionan a vigilá e “opvang” pa algun dia i a tuma nota di tur moveshon i asta a saka potrèt.

Awe e funshonarionan mester reuní ku e persona responsabel pa e “opvang” pa asina wak kiko ta bai bira e siguiente paso. Miéntras tantu a para tur operashon di e “opvang” aki.

Cornelis a indiká ku bou di ningun sirkunstansia e sitio no ta adekuá i sigur pa atendé ku mucha.