Mas trahadó kontratista mester bai kas

WILLEMSTAD.-E grupo di kontratista lokal ku aliansa internashonal ta mira dianan ta pasa i nan ta mas preokupá. Den dianan tras di lomba un bia mas nan mester a aserka deportamentu di labor pasobra simplemente no tin niun manera mas pa sigui tene trahadónan den servisio. Sindikatonan den e sektor petrolero tambe ta skucha di nan miembronan ku mas i mas trahadó ta hasiendo trámitenan pa bai for di Kòrsou una bes ku nan no tin konfiansa ku e trayekto nobo ku Refineria di Kòrsou a kuminsá lo resultá den algu konkreto.

Manera EXTRA a informá den simannan tras di lomba, e grupo lokal ku ta interesá den operá i manehá refineria Isla ta konsistí di entre otro sindikatonan APRI i PWFC, e kontratistanan mas grandi di Kòrsou, un kompania brasilero grandi ku ta asesorá pa un empresario lokal di renombre. E grupo lokal aki a indiká ku nan ta kla pa tuma e refineria awor. Pa medio di e empresario lokal di renombre a duna garantia na premier Rhuggenaath ku si RdK ta deseá por pone suma di plaka riba un ‘escrow account’ pa demostrá ku ta trata di un asuntu serio i ku e fondonan ta disponibel. Sinembargo premier Rhuggenaath i RdK a di opinion ku no por hasi eksepshon, mester kana e prosedura den tur trankilidat pa wak kua kompania tin interes, kua tin e konosementu i sufisiente fondonan finansiero pa operá i manehá e refineria.

For di e grupo lokal ta trata di tur manera pa e proseso por kana un poko mas lihé, pasobra tur luna ta mas tantu hende nan mester manda kas. E grupo ta konsiente di normanan di ISO i tambe Corporate Governance na kua opviamente tantu premier komo RdK ta tene nan mes na dje, sinembargo asta den ISO komo Corporate Governance ta duna e posibilidat pa kana e liñanan di prosedura òf ‘justify’, esta hustifiká un otro desishon. Representantenan di e grupo lokal ta kere ku na e momentunan aki ku tin asina tantu hende sin trabou i e perspektiva no ta pinta niun tiki alentador, ta momentu pa ‘justify’. Hustifiká desviashon di prosedura pa logra apertura di e refineria.