WILLEMSTAD.- Despues di hopi promesa durante kampañanan elektoral na aña 2021, èks sindikalista i trahadó riba tereno di refineria Isla, Hensley Harms ta konstatá ku 4 aña ainda no tin aktividat riba tereno di refineria Isla. E ta lamentá e situashon inmensamente i ta mustra ku no solamente tabatin promesanan falsu ku polítika a hasi, pero ku parlamento, trahadónan, sindikatonan i komunidat den su totalidat ta sinta man krusá sin ku ta tumando akshonnan konkreto.

EXTRA a aserká Harms ku tabata krítiko durante e último 3 añanan riba e situashon rondó di refineria Isla, pa duna su opinion awor ku ta e periodo di gobernashon 2021-2024 ta yegando na su fin. 21 di mart tin elekshon pa parlamento i gobièrnu ta bira demishonario. Harms su promé reakshon ta ku ta di lamentá ku despues di mas ku 3 aña i mei di gabinete Pisas, nada a pasa riba tereno di refineria Isla.

“Esaki ta debí na promesanan bashí, sin vishon i sin un plan konkreto di gabinete Pisas i spesífikamente promé minister Gilmar ‘Pik’ Pisas. Simplemente a papia algu pa komplasé otronan pero no tabatin un kambio pa e situashon ku trahadónan ta aden i komunidat no a mira nada konkreto tuma lugá den e sektor petrolero.” Harms ta bisa ku a yega bèk na e punto ku partidonan polítiko ta kore kampaña atrobe i bolbe trese e mesun retórika dilanti ku no por deskartá e posibilidat ku e refineria ta habri atrobe.

“E industria di refineria no ta posibel mas na Kòrsou. Gobièrnu mes a eliminá e posibilidat ku lo por refiná krudo na Kòrsou atrobe. Na lugá di a implementá un plan konkreto tabatin yen drama ku kompanianan dudoso ku a skohe komo ‘preferred bidder’, falsifikashon di dokumento ku a resultá den investigashon penal. Mas importante ainda a resultá ku e kompanianan akí no tabatin sèn pa invertí pa asina por a habri refineria atrobe.”

Harms ta bisa ku mientrastantu por a tuma nota sí kon a keda saka sèn for di reservanan di Refineria di Kòrsou ku ta doño di e planta na Emmastad i e terminal na Bullenbaai. “A usa sèn pa entre otro buska operadó,  sera kontratonan, hasi mantenshon mitar mitar. Pa ami ta un grupo ta sigui saka sèn riba lomba di trahadónan djis pa bisa ku ta hasi algu.”

Asfalt

Harms ta sigui bisa: a primintí ku ta habri e planta pa produsí asfalt i ku e trein di asfalt ta bai kore pero mas ku 2 aña a pasa i te ainda nada. Trabounan pa drecha ‘jetty’ i planta di gas pa asina por start ku e produkshon di asfalt a keda na mitar pa falta di material. Otro prosesonan ku tambe ta nesesario pa por produsí asfalt te ainda no a kuminsá.”

El a mustra ku kada bes ta skùif fecha pa e trabounan kuminsá. “Algu ku mi a reklamá na diferente okashon e último 3 añanan. Si no tin sèn no mester tira pará tampoko, hasi manera ta drecha algu kaminda ta trabou fiktisio pa un grupito saka sèn for di Refineria di Kòrsou.”

Foto: