“Aanwijzing” òf instrukshon kiko e ta i ki balor e tin pa Kòrsou i su pueblo (1)

WILLEMSTAD.- Ta hopi importante pa nos komunidat komprondé kiko ta un “aanwijzing” i ki balor esaki por tin pa pueblo. Pa e motibu ei EXTRA a bai buska e splikashon na plaka chikí pa informá nos komunidat.

E “aanwijzing” òf instrukshon ku gobièrnu di Kòrsou a haña djabièrnè 12 di yüli último ta simplemente un instrukshon den kua gobièrnu di Reino ta bisa gobièrnu di Kòrsou ku mester kumpli ku leinan den e “Rijkswet Financiele Toezicht” (Rft) ku ta enserá hasi e presupuesto di Kòrsou balansá bèk konforme lei.

Kon gobièrnu ta bai hasié, ta gobièrnu di Kòrsou mester tuma e desishon. Konseho di Minister di Reino (RMR) por duna e liñanan grandi, por ehèmpel segun e normanan den Karibe e gastunan di personal di gobièrnu mester ta x% di e produkto Nashonal Brutu anto na Kòrsou e gastunan di personal di gobièrnu ta  x% riba e norma di Karibe i komo tal mester bah’é poulatinamente den 1 , 2 òf 3 aña. E aanwijzing mes no ta bisa Kòrsou ku mester tuma desishon a, b,c òf d.

Den e aanwijzing di 2012, gobièrnu di reino a purba indiká kiko por hasi i a laga na Kòrsou mes pa disidí kiko i kon e ta aktua. Pues RMR ta indiká kiko Kòrsou LO POR hasi.

No mester lubidá ku nos ta biba den un pais demokrátiko, anto esun ku demokrátikamente ta yamá pa bisa kiko ta hasi ta esun ku ta representá pueblo anto esei ta den Parlamento. Pasobra e eskohonan ku mester tuma lugá no ta Cft ni RMR mester tuma e desishonnan ei, pero ta esnan den Parlamento ku pueblo a vota pe. No por kibra e prinsipio demokrátiko ei!

Ku otro palabra e rijkswet financiele toezicht RFT no por bai kontra loke ta pará den nos Areglo di Estado. E mester ta den mesun liña kuné.

Ta p’esei ta Parlamento tin “budgetrecht”. Pues Parlamento ta esun ku mester disidí.

Djis imaginá si Ulanda dikta ku mester tuma medidanan a,b, i c. Esei ta nifiká ku Ulanda a bira parti di e problema si no logra solushon. Tur hende lo mustra dede riba Ulanda pasobra ta nan a bisa ku mester tuma e desishonnan a,b,i c. Ulanda no ke esei!

Kua ta e ròl di Cft i kon ta kana yega na un instrukshon?

Cft (Kolegio di supervishon finansiero) ta un órgano ku ta yuda supervisá kon nos gobernantenan ta usa e sèn ku nos tur huntu ta produsí na belasting. Nan ta wak si e sèn ta keda usá p’e kosnan ku a bisa (presupuesto) ku lo usa nan pe. Cft riba su mes no tin niun poder. Su poder ta bini for di e lei ku ta dun’é e hèrmèntnan p’e por hasi su trabou. Un di su hèrmèntnan ta e asina yamá duna konseho pa un instrukshon na momentu ku un pais no kumpli ke normanan palabrá den e lei di konsenso. Riba su mes Cft no por duna niun di e paisnan den Reino un instrukshon. Solamente e por konsehá e Konseho di Minister di Reino pa na momentu ku un di e pais nan no ta kumpli ku e lei, pues ke normanan di presupuesto, pa dun’é un instrukshon. Awor ta na kua normanan òf lei mester kumpli? Popularmente bisá esaki ta esun di tin presupuesto balansá; esei ke men ku gobièrnu tin sufisiente entrada pa kubri su gastunan. Esaki no ta solamente pará den lei di konsenso aki sino tambe den nos estado di derechi i e reglanan di kontabilidat di e paisnan. Pues Parlamento ku ta esun ku tin e derechi di presupuesto i ta esun ku ta outorisá pa skohe na nos nòmber komo pueblo ta na kiko i ki ora por gasta e entradanan di pais, tambe mester tene nan mes na e regla aki.

Na momentu ku un pais no ta kumpli ku e norma menshoná aki riba e lei ta duna e posibilidat pa Cft konsehá Konseho di Minister di Reino pa duna un instrukshon. E lei ta hopi spesífiko i ta papia di por duna un konseho i no ku mester duna un konseho ora no kumpli ku e normanan. Unabes ku Cft duna un konseho segun e mesun lei aki ta keda na Konseho di Minister di Reino, kaminda e paisnan den Reino tin partisipashon, pa disidí si nan ta aseptá i bou di ki kondishon pa duna un instrukshon. Konseho di Minister di Reino NO ta obligá na sigui e konseho di Cft, i Cft no ta obligá na duna un konseho pa duna instrukshon si e paisnan no ta kumpliendo ku e normanan. P’esei mes e instrukshon ta keda konsiderá komo e último remedi. Den mayoria kaso Cft ta purba yuda e gobièrnu, si esaki ta deseá, pa koregí e situashon ku a pone e pais òf e gobièrnu keda sin kumpli ke normanan.

Dikon instrukshon i kua te benefishinan?

Den e kaso aktual, Kòrsou tin ya kaba 3 aña siguí ku no ta kumpliendo ku e norma di presupuesto balansá apesar ku gobièrnu ta mustra su disponibilidat pa hasi e korekshonnan posibel i a hasi su esfuersonan pa logra esaki. Pues tabata nesesario den e kaso aki, segun Cft pa nan a duna un konseho pa duna instrukshon na Kòrsou.

Awor e pregunta ku ta sigui ta kua te benefisio di e instrukshon pa Kòrsou. Ken ta sinti algu di esaki i den ki forma? E benefisio ta sinta den e echo ku di un forma obligá ta imponé basa riba palabrashonnan ku e paisnan tin ku otro, ankrá den e lei di konsenso. Un pais ta hañ’é tin ku tuma desishonnan pa bou di kondishonnan realisá presupuestonan balansá. Gasta mas di loke bo ta produsí na entrada lo bolbe hiba pais na e posishon kaminda parti di loke e ta produsí ta bai pa paga debe i interes. Pues sèn ku por a invertí den ekonomia, sèn ku por a invertí den enseñansa i sèn ku por a invertí den kuido i den mehorashon di e kalidat di bida p’e siudadano, mas i mas ta bolbe bai pa paga interes na esnan ku ta fia gobièrnu p’e por kubri su défisitnan. Na aña 2010 Ulanda a yuda Kòrsou pa likidá un debe di kasi 3.5 mil mion florin Antiano p’asina e por a skapa di hañ’é ta paga kasi 300 pa 400 mion pa aña solamente na interes. A kumbiní entre paisnan ku ta bin un Cft i e lei di konsenso p’asina nunka mas Kòrsou no hañ’é den un situashon igual.

Den e próksimo edishon lo sigui mas splikashon detayá.

 

SHARE

LEAVE A REPLY