WILLEMSTAD.-Awe mainta mas o ménos 06:15 sentral di polis a haña notifikashon ku tin un hòmber tur na sanger den balkon di un kas na Kaya Strena. Bosero di polis Maurits Rosalina den deklarashon na EXTRA a indiká ku e informashon preliminar ta mustra ku abitantenan di e kas a lanta mainta i topa un hòmber den nan balkon di kas. Mesora ku nan a yama polis sentral a manda un patruya ku na nan yegada a topa ku un hòmber ku diferente impakto di bala na su kurpa. E hòmber no tabata duna señal di bida mas.

Polis awe tardi a duna di konosé ku nan a haña i konfiská un kantidat di ‘huls’ na e sitio i tabatin perforashon di bala den muraya di e kas. Dokter di polis alrededor di 07.20’or a konstatá morto di e hòmber, Sidney Marten Mercelina nasé na Kòrsou dia 11 november 1994. Riba òrdu di fiskal di Ministerio Públiko a tuma e kurpa sin bida den beslag pa mas investigashon.
Mas detaye den bo edishon di EXTRA.