WILLEMSTAD.- Lysaye de Windt i Reynold Carti konosí komo Saway, abitantenan di Skalo i Fleur de Marie a kuminsá un kampaña di yuda hende registrá, pa nan por bai vakuná. Nan a kuminsá djárason e siman aki i den dos dia a registrá mas di 40 persona pa vakuná.

Saway ta manera un lider di bario i tantu e komo Lysa de Windt ta stima e bario di Fleur de Marie, Skalo i bisindario. Nan a splika EXTRA ku nan ta motivá e hendenan pa bai pasa e angua. Mas hende vakuná mas mihó pa nos mes.

Tur kos a kuminsá ora Saway a pidi Lysa pa e yuda un hende ku registrashon online, pa e por bai vakuná. El a disidí ku pa e hasi un, mihó hasi mas. Nan a improvisá i Saway ta kana wak e hendenan interesá pa vakuná i ku no ta kedando kla via telefòn òf online, nan ta bai parke Leyba i ta yuda nan.

Huntu ku e persona interesá ta pasa dor di e kuestionario riba e wèpsait i asina registrá e persona pa e por haña sita pa vakuná.

Echo ta segun Lysa i Saway ku no ta obligá niun hende pa vakuná, pero ta yuda esnan interesá.

Djárason a atendé 22 hende entre 3 i 6 or di atardi. I ayera djaweps a yuda den kareda di 20 hende, te ku 5 or di atardi.

Lysa a bisa ku miéntras hende ta interesá, e ta dispuesto na sigui yuda traha e sitanan.

Manera el a bisa ku tòg tin Lockdown i ta na kas nan ta, nan ta usa e tempu pa yuda otro.

Ta importante pa hende vakuná pasobra e ta un kontribushon pa nos pais yega bèk kaminda e tabata i evitá ku hende ta bira malu sin nodi. “Nan a duna nos un solushon ku ta e vakuna i dikon no hasi uso di dje”, Lysa a bisa EXTRA.

Saway i Lysa  a bisa ku no ta hende di Skalo i Fleur de Marie so nan ta yudando, pero asta nan a yuda hende di leu manera Seri Fortuna, Koraal Specht, Zwaan i asta Groot Sta. Martha ku tabata den bario, pa kasualidat. Ta hendenan ku ta frekuentá den Skalo i nan tambe a bai pa yuda inskribí.

Saway i Lysa ta hasi un yamada na otro organisashonnan pa yuda. Buska hendenan ku no tin e posibilidat pa inskribí online, duna un man i inskribí nan pa por vakuná.

Lysa a haña reakshon di 2 persona kaba ku a haña e inisiativa aki masha bon i ku nan tambe ke hasié den nan bario. “Un ta siña otro”. Ta di e forma aki ta yega mas serka di e poblashon i na su turno por yega e meta final i tin gran parti di pueblo vakuná. I si tin mas grupo yudá, pa fin di aprel sigur lo yega e meta ei.

Ku énfasis Saway i Lysa a pidi pa no stèns riba gobièrnu so. Ta nos tur ta gobièrnu i mas hende yuda ta mas mihó.