Fundashon Viba: ta entrega keho i daño di perhuisio

WILLEMSTAD.-Abitantenan di Lagun un bia mas a demostrá ku no ta bai permití ku ta trapa nan derechonan. Resientemente a basha muraya abou ku a keda lantá di forma ilegal. Abitantenan ta splika ku nan a limpia nan tereno, pasobra apesar di dos veredikto di korte un invershonista a trata na evitá di kumpli ku veredikto pa basha e muraya konstruí ilegal abou.

Ta trata di un muraya ku e invershonista a konstruí riba tereno di e Fundashon Sentro di Bario Lagun i dos wikènthùis ku ta pertenesé na e sentro di bario. Den un enkuentro ku prensa un grupo di abitante a splika ku nan intenshon ta pa trese e bèrdat na klaridat, pasobra anteriormente e invershonista a hasi denunsia kontra abitantenan pa destrukshon di su propiedat, pero e invershonista a lubidá di splika ku e konstruí riba tereno ku no ta pertenesé na dje.

Durante di e konstrukshon di parti di e invershonista a kibra e berpùt ku ta pertenesé na e sentro di bario. E abitantenan a duna di konosé ku nan ta bai entrega denunsia na outoridatnan i tambe por spera un demanda pa daño di perhuisio kontra di e invershonista pasobra ta debí su komportashon a stroba e fundashon di generá fondo pa mantenshon di e sentro di bario i wikènthùis nan. Segun sr. Petroudis, por spera un demanda di alrededor di 1 mion florin kontra di e invershonista.

Algu ku sigur a hala atenshon ta e momentu ku sr. Petroudis a bisa ku e presidente di fundashon Lagun a haña un yamada den kua a kòrd’e ku mester firma su kontrakt di nobo. Esei a pone ku e presidente no tabata presente na e manifestashon awe mainta na Lagun. E fundashon Lagun ta kai bou di responsabilidat di ministerio di asuntunan di Enseñansa.