WILLEMSTAD.- Na nòmber di 23 abitante sra. Dini Advokaat-Pestana ta pidi atenshon pa situashon rònt hospital Advent. Advokaat-Pestana ta bisa ku te ainda hospital no tin pèrmit pa hopi aktividat ku nan ta hasiendo. Tres aña pasá e hospital mes a hasi petishon pa un ‘hinderwetvergunning’. Advokaat-Pestana: “Pero te ainda gobièrnu no a kontesta riba esaki. Pa kolmo nos por a lesa den EXTRA algun dia pasa ku Adventziekenhuis lo kuminsá yuda CMC pa aliviá un lista grandi di espera pa MRI. Mi no ta kontra esaki. Ta importante ku hende por haña tratamentu médiko. Pero mi no ta di akuerdo ku gobièrnu no ta tuma su responsabilidat. Hospital Advent no tin su pèrmitnan na òrdu. Nos komo abitantenan tin hopi molèster di bishitante di hospital. Hende ta parker den bario mes. Den bes en kuando komo abitante nos no por sali pasobra hende ku ta bishitá e hospital ta parker riba e stupinan. Tin hende ku ta pishi den kurá, mamanan ku ta laga pèmper sushi riba nos stupi. E molèster ta grandi. Nos ta pidi gobièrnu pa duna klaridat.”

Advokaat-Pestana a bisa ku minister Charles Cooper di VVRP ta na altura di e situashon, pero no ta kontesta yamada di e sra. Advokaat-Pestana mas.

Minister di salubridat Dorothy Pietersz-Janga no ta hasi nada ku petishon di pèrmit ku Adventhospitaal a hasi.

Manera ta konosí for di aprel di e aña aki, e MRI di CMC no ta den funshon, pasobra el a daña. Dor di esaki a surgi un lista di espera pa hasi uso di MRI di alrededor di 700 pashènt. Adventziekenhuis lo yuda CMC pa aliviá e lista di espera. Nan lo yuda pashènt riba djasabra i djadumingu, kuminsando wikènt último.

Advokaat-Pestana ta bisa ku den pasado, na nòmber di abitantenan, el a bai korte diferente bia. A tuma diferente paso hurídiko, pasobra Advent ta ekspandé riba diferente tereno, sin pèrmit.

Tòg e ta sinti ku e problema mas grandi ta ku gobièrnu no ta tuma su responsabilidat. “Mi a purba di haña oido na ministerionan, na ministernan. Pero mi ta sinti ku nan no ke duna atenshon na e situashon. Pa e motibu mi  ke splika na prensa kiko ta nos preokupashon. Nos no ta kontra e echo ku hende ta haña tratamentu médiko, pero gobièrnu tin ku tuma su responsabilidat ku Adventhospitaal!’