WILLEMSTAD. - Un situashon penoso i kasi no por deskribí, ta e situashon ku un persona ta pasando aden. E persona aki ta hopi suak, malu i no por kana mas. Su úniko speransa ku tabatin ayera pa e por a haña un dòkter pa wak e, a kai na awa ora ku el a yega na un di e kasnan ku ta yuda hendenan sin dak i adikto, no a lag’é drenta, miéntras e tabatin un sita ku un dòkter 10 or di mainta.

Dos siudadano hóben di e bario di St. Jago ta teme ku si nada no sosodé urgente pa e persona menshoná, e persona aki lo no sobrebibí un dia mas den e situashon ku e ta.

Siudadano bibando den situashon penoso

Konforme e siudadanonan, t’asina ku e persona por ta un adikto, pero esaki no ta forma kon pa atendé ku hende. E persona tin e malesa di HIV, e mester di su remedinan, banda di esei e tin mas problema di salú i dia pa dia por mira kon e persona aki ta bai atras.

El a buska yudansa pa e por logra haña su remedinan, pero nada no ta parse ta na su fabor. Te na ora el a haña un sita pa un dòkter wak su kondishon di salú i buska un solushon pa su situashon ku e ta aden, ayera e ta keda rechasá pa un di e kasnan ku ta yuda adiktonan, esta kaminda ku e tin afsprak.

E persona aki no por para mas riba su pia. Pa e bai urina òf hasi su nesesidat, e no ta logra kana yega un sitio privá mas. E mester di bruki, remedi i un kaminda ku e por drumi anochi.

Na e momentunan aki e ta drumi riba stupi di un snèk den e bario di St. Jago sin nada pa e tapa su kurpa.

E dos siudadanonan ku ta sumamente preokupá pa e situashon ku e persona aki ta aden, a hiba laken pa e tapa i a dun’é algu di kome di manera e por haña forsa pa e por lanta awe mainta i sigui buska yudansa.

E dos hóbennan ta di opinion ku aki ta trata di un ser humano i no por trata hende asina, ni maske kiko el a yega di hasi den su bida. Mester buska un forma ku e persona aki por haña sikiera e ayudo básiko.

Si ayudo no yega pronto, e persona aki lo no sobrebibí un dia mas den e situashon ku e ta aden, pa motibu di su remedinan ku e mester i e ta demasiado suak.

E siudadanonan ta spera ku mas pronto posibel sali un yudansa pa e persona aki.