Abogado Larmonie ta logra redusí kastigu pa hòmber ku a kibra negoshi durante Sakeo

WILLEMSTAD.- E akusado Kensley Martina (27) a keda kondená na 12 luna kual 6 kondishonal ayera den Hof, pa destrukshon i ladronisia den dos establesimentu durante sakeonan ku a tuma lugá dia 24 di yüni último den manifestashon.
Den korte di promé instansia Martina a keda sentensiá na 12 luna inkondishonal. El a apelá su sentensia pa motibu ku e ta haña e kastigu muchu hopi.
Martina ainda ta enkarselá. Ayera el a presentá den Hof pa 3 hues trata su kaso di nobo. Ministerio Públiko a akus’é di ta esun ku a kue un blòki di betòn kibra port’i glas di Multitronics, pone ku un multitut grandi di hende a kore drenta e negoshi i bai ku vários produkto.
Segun prosèsverbal di polis por a mira e akusado den imágennan di kámara kon el a kibra e lugá drenta. Estando paden, el a kue algun tablet,telefòn i vários “headphones”.
Tambe e ta keda akusá di a kue un stof for di e Connections na Otrabanda bai kuné.
E akusado a atmití su kulpa. El a bisa ku e dia ei el a bai manifestá i a bebe hopi alkohòl, pero no tabata su intenshon pa hasi nada. Segun e akusado bèrdat el a kue e stof, pero a lag’é keda den kaya.
E ta lamentá e loke el a hasi i a bisa ku e no tabata su mes.
Abogado general a haña e akusashon probá, mirando e deklarashon di e akusado mes i tambe imágennan di kámara. Abogado general a splika, ku e akusado a deklará no tabata su intenshon pa kometé sakeo, e ore’i e no mester a drenta den e negoshinan. El a hasié na Otrabanda i despues bolbe hasié den Saliña. Segun abogado general, dor ku polis tabata para eifó, el a disidí di benta e kosnan abou.
Abogado general a bisa kon grave e loke e akusado a hasi ta i kuantu daño emoshonal i finansiero el a kousa e propietarionan di ámbos negoshi. Abogado general a para ketu tambe na e daño inmenso ku el a kousa pais Kòrsou, pone ku entre otro hopi turista a kanselá nan biahe di fakansi pa nos isla.
El a bisa ku hustisia a tum’é hopi na malu pa loke el a hasi.
Mirando e daño inmenso i ta un di esnan ku a bati e negoshi kibra, pa despues kue un kantidat di artíkulo, abogado general a yega na e demanda di 12 inkondishonal pa e akusado.
Abogado Larmonie den su defensa a splika Hof ku Martina ta e úniko ku a haña un kastigu haltu den e kasonan di sakeo i ainda ta enkarselá. E abogado a tuma ehèmpel di e kaso resien kual e hòmber ku a sende e outo di polis na kandela a keda sentensiá na 12 luna prizòn. Segun e abogado, e kimamentu di outo polis, ta hopi mas grave ku loke su kliente a hasi, pues ta imposibel pa pidi e mesun kantidat di luna pa Martina.
El a bisa tambe ku e hues den korte di promé instansia a hasi komo si fuera ku Martina tabata na kabes di e grupo ku a basha drenta den Multitronics, pero ku esei no tabata e kaso.
Abogado Larmonie a pidi Hof pa tene kuenta ku e akusado tin un negoshi di laba outo di su mes pa kria su famia i anochi e ta kore rekohé sèn pa un kadena di number. E abogado a bisa tambe ku e akusado ta esun ku ta kuida su mama i su famia ku ta dependé riba dje.
E tribunal di Hof a bai deliberá i despues a bin bek i redusí e kastigu na 12 luna di kual 6 kondishonal. Pues pronto e akusado lo rekobrá su libertat.