WILLEMSTAD.- Ayera un bia mas abogado Peppie Sulvaran a baha pisa den su defensa, kontra Ministerio Públiko, relashoná ku e kaso kontra di su kliente L. Yeung (49). Yeung ta será pa un kargamentu grandi di droga ku arma, huntu ku ruman hòmber i ta wardando riba tratamentu integral di e kaso, dia 28 di yüli binidero.

Pero Yeung tin un problema serio ku su wowo i segun rapòrt médiko, e ta mira solamente 20 %  na un wowo I e otro 5%.

Pues praktikamente e ta kedando sin su bista.

Abogado Sulvaran anteriormente a entamá un huisio sumario kontra Ministerio Públiko, pa “skors”detenshon di Yeung, mirando ku na su opinion, ta inhumano pa keda kuné será, mirando situashon di salú. Hues van Lieshout, no a haña ku e motibunan tabata sufisientemente bon motivá e dia ei i a rechasá e petishon.

Segun e rapòrt di dòkter Maduro, Yeung mes a rechasá pa sigui tratamentu médiko.  Yeung ta boga pa bai Colombia serka e spesialista ku semper a trat’e.

Abogado Sulvaran a bisa ayera, ku pa e ta inkomprendibel e sistema kon OM ta keda pone tur kos, pa laga e hòmber keda den e mesun situashon. El a bisa ku normanan humano, no ta keda tumá manera mester ta den e kaso aki. Segun e abogado, e no ta mira pa pakiko mester laga e hòmber keda sufri, pa mas ku un aña largu. Mirando e situashon di Yeung su bida, e mester wòrdu saká inmediatamente for di prizòn.

El a bisa ku mester tin un manera mas humano kon ta atendé ku e tipo di  hendenan aki. Segun e abogado si bo ta chòler, pober òf malu den prizòn, no tin trato p’abo aki na Kòrsou. E abogado a sigui bisa, ku no tin rèspèt pa e tipo di hendenan aki na Kòrsou siendo ku na Hulanda, e trato no ta asin’aki.

Segun e abogado, OM a duna prizòn órden, pa hinka Yeung den un departamento sikiátriko bou di òrdu di e direktor di e instituto. Nan a pone Yeung den un departamento huntu ku hendenan ku problema sikiátriko, sin ku dòkter  Heitel di prizòn tabata na altura.

Pa loke ta trata dòkter Maduro, e abogado a bisa, ku  e dòkter aki no por papia muchu di Yeung, paso e no sa ta den prizòn mes. Yeung a mir’e nèt 3 bia i e dòkter no a ni puntr’e konta ku su salú. Ora ku Yeung a haña un derame di sanger na su wowo, no por a haña e dòkter niun kaminda, segun e abogado.

E abogado ta haña ku e loke Yeung ta pasando aden, ta un detenshon inhumano. E dòkter no sa nada di e kliente i no sa mes, ku e tin ku uza insulina òf otro remedinan.