WILLEMSTAD.- Resientemente Hof a trata petishon di deseonan di investigashon kaso RDK den “raadkamer”.
Ta trata di e kaso ku a haña e nòmber “Lacerta” i lo bai keda presentá den Hof próksimamente. Den e kaso resientemente ku a keda tratá porta será, e diferente abogadonan a hasi algun deseo di investigashon entre otro pa skucha algun testigu. E tribunal a bisa ku nan lo bai pens’é pa tuma un desishon den e próksimo dianan aki.
Ta trata di e akusadonan Gilbert Cijntje, Michelle Kinburn, Ashley Isidora ku a keda kondená na 30 luna di prizòn i Roderick van Kwartel eks direktor di RDK na 36 luna den korte di promé instansia.
Tur a keda akusá pa korupshon na Refineria di Kòrsou (RdK).
Nan a apelá nan sentensia pa motibu ku nan no ta di akuerdo ku e kastigu.
Ministerio Públiko a demandá Cijntje, Kinburn i Isidora na 4 aña, miéntras van Kwartel a keda demandá na 5 aña mirando su posishon i ku e lo mester tabata sa mihó.
Den e veredikto hues a relatá ku e akusadonan a hasi nan mes kulpabel dor di pidi un suma grandi bou di mesa pa privilegiá un dje partnernan ku tabata interesá pa operá refineria na yanüari 2020.
Komo empleado públiko trahadó di RDK, nan a hasi mal uzo di nan posishon pa asina favoresé nan propio saku finansieramente, en bes di interesnan di pais Kòrsou i su siudadanonan, segun e veredikto.
Esaki a bai a base di e kuestion di e prosedura pa yega na un partner stratégiko nobo pa e refineria ku tabatin interes di pais ku tabata di sumo importansia.
Tur kos a kuminsá despues ku minister presidènt Eugene Rhuggenaath a hasi un denunsia na OM di posibel korupshon di e akusadonan en kuestion.
Gobièrnu di Kòrsou huntu ku e Hunta di Komisario di Rdk a hasi denunsia di posibel echonan kastigabel.
E kaso a sali na kla na momentu ku abogado di gobièrnu a bati alarma ku e direktor e tempu ei van Kwartel huntu ku e tres ko akusadonan lo tabata metí den e “trayekto paralelo” pa buska un partner nobo pa refineria.
E trayekto paralelo aki tambe tabata mará na un suma di plaka di mas ku 5 mion florin.
Hues di korte di promé instansia a haña ku e echonan probá ta asina grave, ku solamente kastigu inkondishonal ta kuadra pa e akusadonan