WILLEMSTAD. - Abogadonan Pepie i Athena Suvaran a distansiá pa un òf otro motibu for di e akusadonan Edmar “Eto”Clemencia i Remyson Martina, akusá pa dòbel asesinato na Weto. Esei tabata motibu ku ayera a bolbe posponé e tratamentu di e kaso.
E kaso tin 2 aña andando sin por keda tratá den korte di promé instansia.
Ta trata di un krímen ku a tuma lugá na Weto dia 7 di aprel 2019.
Anteriormente Ministerio Públiko a manda Clemencia Hulanda pa su propio seguridat i seguridat di prizòn, tumando na konsiderashon ku Clemencia ta kabesante di e geng Army, loke ku Clemencia a ninga den un forma kategóriko.
E tempu ei su abogadonan a bisa ku niun momento a duna indikashon ku Clemencia su bida tabata na peliger.
Esei a pone ku Clemencia a regresá Kòrsou pa motibu ku kontra di su boluntat a mand’e Hulanda.
Clemencia ta keda sospechá di ta esun ku a ordená Martina pa likidá e víktima De Pablo.
Esaki ta pone ku Martina ta keda akusá ku riba e fecha enkuestion, a likidá e hòmber Ulrich C.C. De Pablo despues di a lòs vários tiru riba dje. Esaki ta trese e akusashon premeditá kuné.
E di dos akusashon ta ku el a lòs bala tambe riba e víktima Shurijon C. Noor ku tambe a pèrdè su bida.
Tambe e ta keda akusá pa intento di asesinato riba M.S. i òf I.B-R., riba e mesun dia.
Ministerio Públiko ta akus’é tambe di a kita un vehíkulo for di e víktima St. L.F., dor di a blòkia e vehíkulo i obligá e víktimanan baha for di e outo bou di menasa di un arma di kandela.
El a kita tas ku 400 florin for di e víktima i tambe su telefòn.
Por último Ministerio Públiko ta akus’é pa poseshon di arma di kandela.
Durante e investigashon, e pareha di Clemencia a duna vários deklarashon inkriminatorio na polis kontra dje, pero despues a kambia su deklarashonnan den sala di korte.
Esei a pone ku fiskal a pidi detenshon di e pareha pa perhurio.
Ámbos akusado ta para riba nan inosensia, pero korte ta haña ku tin indikashonnan fuerte i grave den nan kontra.
Abogado mr Dickens ta esun ku a tuma e kaso over i a pidi tempu pa studia e dosié i e kaso lo keda tratá dia 18 di mart binidero.