A laga trahadónan kere ku ABVO tin sociaal statuut kla kaba!

WILLEMSTAD.-Ta reina un situashon di intrankilidat bou di empleadonan di PSB Bank despues ku a bira konosí ku ta e intenshon pa duna retiro na tur empleado di e instituto awor ku el a bai forma parti di APC Bank. Informashon ku EXTRA ta dispone di dje ta mustra ku trahadónan no a keda niun tiki kontentu ku e forma ku esnan na kabes di e banko ta aktuando. Ainda tin e direktornan suspendé i manera ta pinta ta un persona so den e hunta di komisario, aparentemente ku bendishon polítiko, ta kana su kaminda ku su pensamentu. Anteriormente e presidente di partido MFK i aktual minister di Enseñansa Sithree van Heydoorn a mustra riba e situashon aki den un entrevista ku EXTRA.

Despues di buska e desaroyonan den e kaso aki EXTRA a komprondé ku trahadónan ta pendiente di nan sindikato ABVO. Den kombersashon ku e miembro di direktiva di ABVO ku ta atendé ku PSB Bank, Marlon Manuela el a konfirmá ku ainda ABVO no a logra haña kombersashon ku Os Eleonora ku ta e persona ku ta atendiendo futuro di PSB Bank i su trahadónan. For di dia ku ABVO a pidi pa reunion e persona aki a bai afó i ta ayera el a bini bèk. Entretantu ABVO a haña bon informashon di trahadónan di CHB i tambe PSB, pues ABVO ta kla pa negoshá. Manuela a bisa mas aleu ku ta hopi punto ku gerensia òf mihó bisia e persona na enkargo di PSB a papia ku trahadónan pero ku no ta kuadra. A bisa hopi kos ku supuestamente ABVO lo ta na altura di dje i asta ku ABVO lo a bai di akuerdo kuné. E kos aki no por pasobra ABVO ni sikiera ta na altura di e puntonan ei. ABVO no ta bai aseptá e kos aki!

E miembro di direktiva di ABVO a duna di konosé ku awe e ta bai buska informashon kon a para ku e reunion ku nan a pidi. Riba insistensia di EXTRA Manuela a konfirmá ku entre otro e persona den representashon di gerensia lo a bisa trahadónan ku ABVO ta na altura i ABVO tin e ‘sociaal statuut’ kaba kon mester regla tur asuntu di trahadónan ora retirá tur hende. E kos aki no ta kuadra ètòl. Ta imposibel ku un dirigente ta bisa ku ABVO tin e ’sociaal statuut’ miéntras ku apénas a menshoná e palabra den un reunion. Ta inkorekto ku ta malinformá e trahadónan di e forma aki. Detayenan amplio den edishon di EXTRA.