WILLEMSTAD.- Sindikato ABVO ta yama tur miembro i no miembro pa nan ta presente djaluna mainta 8’or na sede di e sindikato. Durante e reunion lo duna informashon riba e proposishon di gobièrnu pa eliminá e lei di 12,5 porshento entrante 1 yanüari 2024 i konsekuensianan di e desishon aki. Tambe lo duna informashon riba pago di bónus di fin di aña awor ku Minister di Finansa, Javier Silvania a disidí di duna Curaçao Medical Center 3 mion florin pa paga e trahadónan un bónus di fin di aña di mil florin.

Pa atardi 4’or ABVO ta pone un seshon di informashon pa tur penshonado. Lo para ketu na e konsekuensia pa sindikatonan relashoná ku desishon di gobièrnu pa eliminá e lei di 12,5 porshento entrante promé di yanüari 2024. Esaki lo nifiká ku e penshonado tampoko lo haña indeksashon di penshun riba 2023. Sindikato NAPB lo no tene un reunion general ku miembronan. Di SAP i STrAF no ta konosí kiko nan plannan ta.

Informashonnan konfirmá ku ta sirkulá ta indiká ku den fin di otro siman, probablemente djaweps e 5 sindikatonan ku ta representá trahadónan den sektor públiko, ABVO, Sitek, NAPB, STrAF i SAP lo pone un reunion huntu.

E echo ku gobièrnu a presentá ku su proposishon pa eliminá e lei pa kòrta ku 12,5 porshento den kondishon laboral di ámtenarnan entrante 1 yanüari 2024 tabata motibu pa e sindikatonan lanta for di mesa durante reunion ku minister di Maneho di Gobernashon, Planifikashon i Servisio Públiko, Shalten Hato den e plataforma GOA djaweps 12 sèptèmber. Esaki pa asina por bai informá miembronan di lokual Hato a bisa ku segun e sindikatonan no tin nada nobo den dje.

Presidente di sindikato SAP, Amado Vilchez a bisa ku despues di a lanta for di mesa e sindikatonan a bai reuní na sede di PWFC kaminda a yama Hato i inform’é ku ta warda pa reuní ku gobièrnu. Esaki pasobra a manda 2 karta kaba pa gobièrnu sin ku a haña kontesta i sindikatonan ke sinta ku gobièrnu.

Segun e ta splika mas aleu ta e sindikatonan ta duna e delegadonan den e komishon sentral di sindikatonan (CCvV) instrukshon pa nan bai den reunion di GOA kuné. Ta pa e motibu aki ku gobièrnu, segun Vilchez, mester sinta ku e sindikatonan promé.

E punto di disputa ta e fecha ku e empleado públiko ta rekobrá tur su kondishonnan laboral atrobe. Entretantu sindikatonan a risibí dokumentonan di e desishon ku Konseho di Minister a tuma siman pasá riba e proposishon di lei i manera tabatin entendí kaba, e proposishon ta stipulá ku e lei ta drenta na vigor ku forsa retroaktivo te 1 yanüari 2024. Punto di bista di sindikatonan ta ku mester bai bèk te 1 yanüari 2023.

Esaki ta duna ámtenarnan i penshonadonan derecho pa kobra indeksashon i “loontrede” òf lumpsum di añanan 2023 i 2024. Na 2023 e grado di kobertura di fondo di penshun APC tabata sufisiente pa indeksá e penshunnan tambe. Si gobièrnu drei e lei aki bèk entrante 1 yanüari 2024 ámtenarnan no ta haña indeksashon di salario na 2023 i konsekuentemente penshonadonan tampoko ta haña indeksashon di penshun na 2023.

Minister Shalten Hato a bisa despues ku e reunion di GOA a para ku na ningun momentu el a bisa ku no por papia tokante e fecha 1 yanüari 2024.

Foto:

...Sindikatonan na sede di PWFC despues di a lanta for di mesa di negosiashon den reunion di GOA...