ABVO na Fòrti pa entrega karta

WILLEMSTAD.-Na e momentunan aki un delegashon di direktiva di ABVO ta den Punda huntu ku trahadónan di Obranan Publiko, ántes DOW ku e meta pa entrega un karta na premier Eugene Rhuggenaath. E grupo ta pará trankil banda di brùg di ponton ta warda otro miembronan i tambe nan ta deliberando riba e plannan ku tin pa atendé ku e situashon ku a surgi den e servisio di gobièrnu, asina sr. Wilson miembro di direktiva di ABVO a deklará na EXTRA.

Trahadónan di OW a pone trabou ayera despues ku e direktor a informa un ámtenar ku e no por sigui traha na e servisio mas i ku e mester bai traha na otro sitio. Koleganan den forma di solidaridat a disidí ku nan ta bai pafó i no ta traha mustrando asina nan malkontentu pa e forma ku ta trata trahadó.

Awe mainta un delegashon ta na Punda pa dentro di poko por entrega un karta na premier. Wilson a splika EXTRA ku tin un protokòl ku ABVO a firma ku OW  den kua ta deskribí e punto di restrukturashon di e servisio. ABVO komo sindikato di empleadonan publiko ta masha konsiente ku restrukturashon ta trese su inkietutnan meskos ku den kaso di reorganisashon. Por spera inkietut pa funshonnan ku por disparsé, kon e organisashon ta bai bira despues di e restrukturashon i otro situashonnan. E sindikato a tuma nota ku a nombra un direktor nobo na OW, pero na logá di sirbi komo un katalisado i sòru pa tin trankilidat den e servisio e direktor nobo tin un komportashon ku hustamente ta hasi trahadónan intrankil.

E meta di ABVO, ku e karta ku ta bai entrega na premier ta pa trese trankilidat bek den OW. E mihó manera pa logra esei pa awor aki ta pa pone un hende ku por trese trankilidat serka trahadónan. Ta rondó di e maneho nobo di OW tur e problema ta sintá.